“Roma” klubi ustozi Joze Mourinyo Braziliya terma jamoasi bosh murabbiyiga aylanishi mumkin, deya xabar qilmoqda The Athletic.

Braziliya uchun asosiy maqsad hamon Karlo Anchelottini olib kelish bo‘lib turibdi. Uning nomzodi Braziliya futbol konfederatsiyasi (CBF) prezidenti Ednaldo Rodrigesga ma’qul kelmoqda.

Rodriges italiyalik mutaxassis bilan faqat vositachilar orqali muzokara olib borgan. “Real” ustozi mavsumning qizg‘in pallasida yuza-yuz uchrashuvga rozi bo‘lmasligini aytgan.

Anchelottining o‘zi “Real”da qolishni ma’qul ko‘ryapti, biroq Madrid klubi sovrinlarsiz qolsa, mutaxassisning klubdagi taqdiri noma’lum bo‘lib qolishi mumkin. “Real” hozircha Karlo bilan kelajakdagi rejalar haqida gaplashmagan.

CBF Anchelotti masalasi noaniq qolayotgani bois muqobil variantlardan iborat qo‘shimcha ro‘yxat shakllantirgan. Undan “Roma” ustozi Joze Mourinyo, “Fenerbahche” murabbiyi Jorje Jezush, shuningdek, Fernando Diniz (“Fluminense”) va Abul Ferreyra (“Palmeyras”) kabi mutaxassislar o‘rin olgan.

Mourinyo qo‘lga kiritgan sovrinlari, xarizmasi va til bilish qobiliyati sabab CBF rahbariyatida ko‘proq simpatiya uyg‘otmoqda.