Andijon viloyati, Baliqchi tumanida sharʼiy nikohdagi ikkinchi turmush o‘rtog‘ini bo‘yoq suyultirgich bilan yoqib yuborgan erkak 17 yilga ozodlikdan mahrum etildi. Bu haqda “Daryo”ga Jinoyat ishlari bo‘yicha Baliqchi tuman sudining raisi Furqat Sobirov maʼlum qildi.
Aniqlanishicha, sudlanuvchi Qahramon Xotamov (ism shariflar o‘zgartirilgan) sharʼiy nikohidagi ikkinchi turmush o‘rtog‘i Dinara Saidovaning yashash uyiga kelib, uyda hech kim yo‘qligiga va xotini yotoqxonada bir o‘zi uxlab yotganiga ishonch hosil qilgach, uning uyquda bo‘lganidan foydalanib, qo‘lida bo‘lgan bo‘yoq suyultirgich moddasini unga sepgan. Dinara ushbu holatdan qo‘rqib uyg‘ongan vaqtida qo‘lidagi yondirgich bilan uni yoqib yuborgan. Marhuma olov alangasidan talvasaga tushib, o‘zini qutqarish maqsadida uy hovlisiga yugurib chiqib, yelim idishdagi suvni o‘z ustiga quyib, olovni o‘chirishga uringan. Biroq Qahramon o‘zining jinoiy maqsadini oxiriga yetkazish maqsadida yana bir bo‘yoq suyultirgichni jabrlanuvchining ustiga sepib yoqib yuborgan. Ayol o‘z jonini saqlab qolish maqsadida yelim idishdagi suvni yana egnidan quyib, ko‘chaga qochib chiqqan va qo‘shnisining xonadoniga yashiringan. Ammo ko‘rsatilgan tibbiy yordamga qaramasdan olgan jarohatlari tufayli oradan 13 kun o‘tib shifoxonada vafot etgan.
“Dinara bilan 2017-yilning sentabr oyida paxta terim paytida tanishganmiz. So‘ngra munosabatlarimiz yaqinlashgach, Dinaraning roziligi bilan sharʼiy nikoh asosida turmush qurganmiz. Birga yashagan davrimiz mobaynida pul yuzasidan turli kelishmovchiliklar chiqqan bo‘lsa tez yarashib olardik. Albatta, doimiy ravishda so‘ragan pullarini berib turardim. Ishlarim yurishmay qo‘ygach, buning imkoni bo‘lmay qoldi. Natijada so‘nggi paytlarda menga nisbatan uning xatti-harakati va munosabatlari o‘zgardi.
Hattoki, telefon raqamimni qora ro‘yxatga kiritib, qo‘ng‘iroqlarimga javob ham bermay qo‘ydi. Pulim borligida yaxshi, ishim yurishmay qolganida esa o‘zini uzoqlashtirayotganini ko‘rib, uni o‘ldirish fikri xayolimga keldi. Shu sababli rejamni amalga oshirish maqsadida yuz bergan voqeani amalga oshirdim. Aybimni tan olaman, qilmishimdan pushaymonman”, — deydi sudlanuvchi.
Shuningdek, sud muhokamasida Qahramon Xotamov 2020-yilning mart oyda fuqaro Otabek Shavkatov ishonchiga kirib, unga Bo‘ston tumanida baliq mahsulotlari muzlatib sotish bilan shug‘ullanish uchun 4 ming AQSH dollari kerakligini, agar berib tursa 1 oyda qaytarib berishini aytib, so‘ngra olgan pullarni qaytarmaslik maqsadida turli bahonalarni vaj qilib 2020-yilning aprel oyidan dekabr oyiga qadar undan jami 14 ming AQSH dollari firibgarlik bilan qo‘lga kiritgani aniqlangan.
Sud hukmi bilan Qahramon Xotamov Jinoyat kodeksining 97-moddasi 2-qismining “j” bandi hamda 168-moddasi 3-qismining “a” bandida nazarda tutilgan jinoyatlarni sodir etganlikda aybli deb topilgan. Unga nisbatan uzil-kesil o‘tash uchun 17 yil 6 oy muddatga ozodlikdan mahrum qilish jazosi tayinlangan.
Shuningdek, Q.H.dan jabrlanuvchi A.X. foydasiga jami 12.500 AQSH dollari miqdorida moddiy zarar undirish belgilangan.
Izoh (0)