Oʼzbek balet sanʼatining yetuk isteʼdod egalaridan biri, O‘zbekiston xalq artisti Hamroyeva Guli Razzoqovna 76 yoshda vafot etdi. Bu haqda Madaniyat va turizm vazirligi axborot xizmati xabar berdi.
Guli Hamroyeva Alisher Navoiy nomidagi O‘zbekiston davlat akademik katta teatrining prima balerinasi, jahon va milliy klassik balet spektakllaridagi yetakchi partiyalar ijrochisi sifatida butun umrini balet sanʼatini rivojlantirishga bag‘ishlagan. U 1946-yil Toshkentda tug‘ilgan, O‘zbekiston xalq artisti Razzoq Hamroyevning qizi. 2000−2002 yillarda balet rejissyori, 2002-yildan Toshkent davlat milliy raqs va xoreografiya oliy maktabi rektori lavozimida faoliyat yuritgan.
Uning “Bog‘chasaroy fontani”, ”Don Kixot“, ”Esmeralda“, ”Dilorom“, ”Sevgi tumori“, ”Spartak” va boshqa ko‘plab spektakllardagi yetakchi partiyalari milliy balet xazinasidan munosib o‘rin egallagan.
O‘zbekiston xalq artisti Guli Hamroyevaning bevaqt vafoti munosabati bilan Alisher Navoiy nomidagi O‘zbekiston davlat akademik katta teatri jamoasi va vazirlik ustoz sanʼatkorning oila aʼzolariga va barcha yaqinlariga hamdardlik bildirgan.
Izoh (0)