Xorijga davolanish uchun boradigan fuqarolar hamda O‘zbekistonga keluvchi chet el fuqarolarining tibbiy xizmat olishida doimiy hamrohlik yo‘lga qo‘yilishi mumkin. Bu haqda 12-aprel kuni “O‘zbekiston sog‘liqni saqlash tizimi transformatsiyasi” mavzusida bo‘lib o‘tgan xalqaro forumda sog‘liqni saqlash vaziri aytib o‘tdi, deb xabar bermoqda “Daryo” muxbiri.
Amrillo Inoyatov o‘z chiqishida mahalliy va xorijlik tadbirkorlarni qo‘llab-quvvatlash uchun quyidagi ishlar amalga oshirilishini ma’lum qildi:
- tibbiyot tashkilotlariga berilgan soliq va bojxona imtiyozlarini saqlab qolish va uzaytirish, tibbiyotda faoliyat olib boruvchi tadbirkorlar huquqlarini himoya qilish choralari ko‘riladi;
- litsenziyalash jarayoni shaffofligi ta’minlanadi;
- tibbiy turizm bilan bog‘liq munosabatlar huquqiy tartibga solinib, sohada faoliyat yuritishning standartlari, yagona tizimi, tartibi va mexanizmlari ishlab chiqiladi;
- ko‘rsatilayotgan tibbiy xizmatlar sifati va bemorlar xavfsizligini ta’minlash maqsadida 2025-yilga qadar barcha tibbiyot tashkilotlarini akkreditatsiyalash tizimi to‘liq joriy etiladi.
- davolanish uchun xorijga boruvchi yoki respublikaga keluvchi fuqarolarning huquqlarini himoya qilish va sifatli tibbiy xizmat olishlarida doimiy hamrohlik qilish yo‘lga qo‘yiladi.
“Avvallari fuqarolarimiz boshqa davlatlarda qiynalib, o‘rtakashlar bilan ovora bo‘lib yurardi. Endi mana shu narsalarning oldini olish uchun har bir bemorga hamrohlik qiladigan tizim yaratamiz”, — deb aytib o‘tdi SSV rahbari.
Forum yakunida 1 milliard dollar miqdorida xorijiy investitsiyalarni jalb etish ko‘zda tutilgan xalqaro memorandumlar imzolandi.
Izoh (0)