Ayollar futboli bo‘yicha Parij—2024 Olimpiya o‘yinlarining Osiyo mintaqasi saralash bosqichi 3-turida O‘zbekiston terma jamoasi 11-aprel, seshanba kuni Iordaniyaga qarshi bahs olib bordi.

Uchrashuvda o‘zbekistonlik futbolchilar 7:0 hisobdagi g‘alabani qo‘lga kiritdi. Diyora Habibullayeva het-trik qayd etgan bo‘lsa, Nilufar Qudratova dublga erishdi. Umida Zoirova va Ilvina Ablyakimova bittadan to‘p kiritishga erishdi.

Shu tariqa O‘zbekiston 100 foizlik natija qayd etgan holda birinchi saralash bosqichini muvaffaqiyatli yakunladi va keyingi bosqichga yo‘l oldi.

Avvalroq Midori Honda shogirdlari Sharqiy Timor (3:0) va Butanni (9:0) mag‘lubiyatga uchratgandi.

Ikkinchi bosqichda 12 ta terma jamoa 3 ta guruhga bo‘lingan holda kurash olib boradi. Guruhda birinchi o‘rinni olgan uchta jamoa 3-bosqichga to‘g‘ridan to‘g‘ri yo‘llanmaga ega bo‘ladi. Yana uchtasi o‘zaro bitta yo‘llanma uchun kurashadi. Uchinchi bosqichda to‘rtta jamoa ikkita juftlikka ajratiladi, uning g‘oliblari Olimpiada yo‘llanmasiga ega chiqadi.

Parij—2024 saralashi

1-bosqich o‘yinlari, 3-tur

11-aprel, seshanba

O‘zbekiston — Iordaniya 7:0

Gollar: 1:0 – 9 Zoirova, 2:0 – 17 Ablyakimova, 3:0 – 44 Habibullayeva, 4:0 – 49 Habibullayeva, 5:0 – 56 Qudratova, 6:0 – 58 Qudratova, 7:0 – 63 Habibullayeva.