Isroil bosh vaziri Binyamin Netanyaxu mudofaa vaziri Yoav Gallantni iste’foga chiqarish haqidagi qarorini bekor qildi. Bu haqda Netanyaxu 10-aprel kuni xalqqa telemurojaati chog‘ida ma’lum qildi. Vazirlar Mahkamasi rahbari mudofaa vaziri bilan “barcha jabhalarda bir sutkada 24 soatlab birga” ishlayotgani va “ixtiloflarni bir chetga surish”ga qaror qilganini aytdi.

Gallantning ishdan bo‘shatilishi haqidagi qaror 26-mart kuni hukumat rahbari ofisi saytida paydo bo‘lgandi. Bu Gallant Netanyaxu hukumati tomonidan ilgari surilgan va Isroilda ommaviy noroziliklarni keltirib chiqargan sud-huquq islohotini ochiqdan ochiq tanqid qilganidan keyin sodir bo‘ldi. Shu bilan birga, vazirning o‘zi iste’foga chiqishi haqida rasmiy bildirishnoma olmagan.

So‘nggi haftalarda mudofaa vazirining iste’fosi haqidagi gap-so‘zlar fonida Isroilda vaziyat keskinlashdi — davlat G‘azo sektori, Suriya va Livandan raketa hujumlariga uchradi. Netanyaxu mamlakat “terrorchilar hujumi ostida” ekanini aytdi. Hukumat rahbari sud-huquq islohotiga qarshi bo‘lganlarni mamlakatda ichki bo‘linishga olib kelganlikda aybladi.

Netanyaxuning sud ishlohotiga qarshi namoyishlar Isroilda bir necha oy davom etib, politsiya bilan to‘qnashuvlarga aylanib ketdi. Ushbu islohot Oliy sud vakolatlari qonun va hukumat qarorlari bilan cheklanishni, Vazirlar Mahkamasi sudyalarni tanlash ustidan nazoratni o‘z qo‘liga olishini nazarda tutadi. Shunday qilib, biror qonun hatto Oliy sud tomonidan mamlakat konstitutsiyasiga zid deb topilsa ham, parlament uni qabul qilish imkoniyatiga ega bo‘ladi. Namoyishchilar hukumatning rejalarini qoralab, buni Isroildagi demokratiya asoslariga zid deb atadi. Ommaviy namoyishlar fonida Netanyaxu sud islohotini muzlatib qo‘ydi.