Zaytun yog‘ining shifobaxsh xususiyatlarini baholash qiyin. Bejiz qadimgi yunonlar zaytunni hayot, salomatlik va unumdorlik daraxti deb atashmagan. Zaytun yog‘i inson va uning salomatligi uchun qanchalik foydali?
Zaytun yog‘i haqida qisqacha ma’lumot
Zaytun yog‘ining shifobaxsh xususiyatlari shunchalik ko‘pki, u sog‘liq uchun eng foydali mahsulotlar qatoriga kiradi. Garchi statistik ma’lumotlarda bu yog‘ dunyoda iste’mol qilinadigan o‘simlik yog‘ining atigi 3 foizini tashkil qilishi aks etgan bo‘lsa-da. Presslash orqali olingan sof zaytun yog‘i inson organizmi tomonidan 100 foiz so‘riladigan noyob mahsulotlardan biridir.
Zaytun yog‘ining shifobaxsh xususiyatlari haqida so‘z yuritishdan oldin ushbu mahsulot tashqi ko‘rinishimizga ham foydali ta’sir ko‘rsatishini qayd etish kerak. Bu har qanday ayol uchun muhim faktdir. Zaytun yog‘i teri va soch tuzilishini yaxshilaydi (buning uchun u nafaqat iste’mol qilinadi, balki oziqlantiruvchi niqoblar tarkibiy qismi sifatida ham ishlatiladi). Hatto vazn yo‘qotish va metabolizmni normallashtirish jarayonida ham zaytun yog‘i, aslida, yog‘dan boshqa narsa emasligiga qaramay, muhim rol o‘ynaydi. Nima uchun diyetologlar uni barcha parhez turlariga kiritishni talab qiladilar? Buning siri shundaki, zaytun yog‘ida mavjud bo‘lgan oleyk kislotasi tanamizda miyaga to‘yish signalini beruvchi maxsus moddaning ishlab chiqarilishini oshiradi. Shu tariqa zaytun yog‘i ochlik tuyg‘usini muvaffaqiyatli va doimiy ravishda bostiradi. Bu oshxonangizda bir shisha xushbo‘y shifobaxsh zaytun yog‘i bo‘lishi uchun yaxshi sabab emasmi?
Zaytun yog‘ining shifobaxsh xususiyatlari
Endi zaytun yog‘ining inson salomatligi uchun foydalari haqida. Birinchidan, bu mahsulot xolesterin darajasini pasaytirish bo‘yicha chempiondir. U ateroskleroz, yurak-qon tomir kasalliklari, diabet, Alsgeymer va boshqa kasalliklarning oldini oladi. Zaytun yog‘ining yana bir shifobaxsh xususiyati: u yallig‘lanishga qarshi ta’sirga ega. Ya’ni zaytun yog‘i organizmdagi har qanday yallig‘lanishni bartaraf etadi — anginadan tortib milk kasalliklarigacha, tromboflebit, oshqozon yarasi va boshqa infeksiyalardan himoya qiladi. Shu bois shifokorlar oshqozon yarasi uchun buyuradigan birinchi davolovchi parhez jadvalida zaytun yog‘i asosiy rol o‘ynaydi.
Zaytun yog‘i tarkibida ayniqsa qimmatli oleyk va linoleik kislotalar, shuningdek, A, D, E, K vitaminlari mavjud. Asosan, aynan shu to‘plam zaytun yog‘ining shifobaxsh xususiyatlarini ta’minlaydi. Ular orasida:
- Ovqat hazm qilish jarayonini normallashtirish;
- Oshqozon-ichak trakti ko‘pgina kasalliklarining oldini olish va davolash;
- Immunitet funksiyalarini oshirish;
- To‘qimalar, organlarning qarish jarayonini sekinlashtirish (zaytun yog‘ida mavjud bo‘lgan ko‘p miqdordagi antioksidantlar tufayli);
- Aqliy faoliyatni yaxshilash, xotirani mustahkamlash, asab kasalliklarining samarali oldini olish;
- Jarohat va yaralarni tezda davolashda faol ishtirok etish;
- Oshqozon shilliq qavatini yaralar paydo bo‘lishidan himoya qilish;
- Suyak to‘qimasini mustahkamlash;
- Saraton kasalligining oldini olish;
Zaytun yog‘i homilador ayollar uchun ham foydali. To‘yinmagan yog‘ kislotalarining yuqori miqdori bolaning miyasini, shuningdek, uning asab tizimini shakllantirishda ishtirok etadi.
Qaysi zaytun yog‘i eng yaxshi shifobaxsh xususiyatlarga ega?
Zaytun yog‘ining dorivor xususiyatlarini to‘liq his qilish uchun qaysi mahsulot eng foydali ekanligini bilishingiz kerak. Sovuq presslash yo‘li bilan tayyorlangan moyni tanlang. Yorliqdagi yozuv shunday bo‘lsin: Extra virgin zaytun yog‘i. Demak, yog‘ni olish uchun faqat mexanik vositalardan foydalanilgan, unga hech qanday issiqlik va kimyoviy ishlov berilmagan. Aynan shu turdagi zaytun yog‘i — qayta ishlanmagan, sovuq presslangan — eng yuqori shifobaxsh xususiyatga ega hisoblanadi.
Mavzuga doir:
Izoh (0)