O‘zbekiston Liberal-demokratik partiyasi tomonidan “O‘zbekiston Respublikasi Konstitutsiyasi to‘g‘risida”gi konstitutsiyaviy qonun loyihasining mazmun-mohiyatiga bag‘ishlangan tashviqot tadbirlarining navbatdagisi poytaxtimizdagi INNO-innovatsion o‘quv va ishlab chiqarish texnoparkida tashkil qilindi.
Ushbu tadbirda Oliy Majlis Qonunchilik palatasi huzuridagi Yoshlar parlamenti aʼzolari, talaba-yoshlar ishtirok etishdi.
“Biz erkinlik uchun ovoz beramiz!” shiori ostidagi ushbu tadbirda O‘zLiDeP Siyosiy kengashi ijroiya qo‘mitasi raisi Aktam Xaitov so‘zga chiqib, Konstitutsiyaviy qonun loyihasining mazmun-mohiyati va unda yoshlarga oid qator normalar o‘z aksini topayotganligini alohida eʼtirof etdi.
Uchrashuvda so‘z olganlar ham bugun barcha saʼy-harakatlar, inson qadrini yuksaltirishga qaratilganini eʼtirof etdilar. Bosh qomusimizga kiritiladigan barcha o‘zgartishlarning negizida ham O‘zbekistonda kechayotgan islohotlar mohiyatini belgilovchi “Inson qadri uchun” ulug‘vor g‘oyasi yotganini alohida taʼkidlashdi. Ayniqsa hujjatda yoshlar masalasi alohida bob darajasiga olib chiqilishi Yangi O‘zbekistonda yoshlar siyosati ustuvor ekaniga yaqqol ishoradir.
Bugun aholimizning 18 milliondan ortig‘ini yoshlar tashkil qiladi. Ushbu ko‘rsatkich 2040-yilga borib 25 millionga yetishini hisobga olsak, Bosh qomusimizda yoshlar masalasi alohida bob bo‘lib kirayotgani muhim ahamiyatga egaligini anglaymiz.
Yangilanayotgan Konstitutsiyada birinchidan, davlat yoshlarning shaxsiy, siyosiy, iqtisodiy, ijtimoiy, madaniy, ekologik huquqlari himoya qilinishini taʼminlaydi, ularning jamiyat va davlat hayotida faol ishtirok etishini rag‘batlantiradi, degan norma mustahkamlanmoqda. Biz demokratik, huquqiy davlat qurishga intilar ekanmiz, kelajagimiz bo‘lgan yoshlar huquqlarini himoya qilmasdan, jamiyat va davlat hayotida faol ishtirokini taʼminlamasdan turib, erisha olmaymiz.
Ikkinchidan, davlat yoshlarning maʼnaviy, intellektual, ijodiy, jismoniy va axloqiy jihatdan shakllanishi hamda rivojlanishi uchun, ularning taʼlim olish, sog‘lig‘ini saqlash, uy-joy, ishga joylashish, bandlik va dam olishga bo‘lgan huquqlarini amalga oshirish uchun shart-sharoit yaratadi, degan meʼyor ham kiritilmoqda. O‘g‘il-qizlarimizning har tomonlama rivojlanishi uchun ularga imkoniyatlar, yaʼni sog‘lom va uy-joyli bo‘lish, taʼlim olish, ishga joylashish, band bo‘lish va dam olish imkoniyatlarini yaratish zarurdir. Davlat bu borada tegishli shart-sharoitlarni yaratish bo‘yicha majburiyat olmoqda, chunki mazkur normalar, nafaqat yoshlarimiz manfaati, balki butun jamiyatimiz va mamlakatimizning farovon taqdiri uchun muhimdir.
Bundan tashqari, yangilanayotgan Konstitutsiyamizda oliy taʼlimda akademik erkinlik berilishi, tanlov asosida davlat hisobidan bepul oliy maʼlumot olinishi, nodavlat taʼlim tashkilotlari qo‘llab-quvvatlanishi to‘g‘risidagi qoidalar yosh avlod hayotini yaxshilash, ularning orzu-intilishlarini ro‘yobga chiqarish, zamonaviy mutaxassisliklarni egallagan holda hayotda o‘z o‘rnini topishi va shaxsiy rivojlanishi uchun imkoniyat yaratadi.
Oxirgi olti yilda oliy o‘quv yurtlari soni 77 tadan 210 taga, ularga qabul esa 5 baravarga ortib, talabalar soni 1 millionga, oliy taʼlim qamrovi 9 foizdan 38 foizga oshdi. Davlat grantlari soni ham 2 baravar ko‘payib, 40 mingtaga yetdi, shundan magistratura uchun 5 baravar ko‘paygan.
Tadbir so‘nggida partiya vakillari yoshlarimizni xalqimiz taqdiri va ertangi kunini belgilab beradigan tarixiy qonunga befarq bo‘lmasdan, 30-aprelda bo‘lib o‘tadigan referendumda yangilanayotgan Konstitutsiya uchun ovoz berishga chaqirdi.
Shu kuni O‘zLiDeP Siyosiy kengashi ijroiya qo‘mitasi raisi Aktam Xaitov Yoshlar parlamentiga saylangan 53 nafar aʼzolar bilan ochiq muloqot qildi.
Ochiq muloqot davomida partiya rahbari tomonidan Yoshlar parlamenti aʼzolari oldida turgan eng muhim vazifalar haqida to‘xtalib, bugungi kundagi muhim siyosiy jarayon O‘zbekiston Respublikasi Referendumi oldidan joylarda tashkil etilayotgan tashviqot uchrashuvida yangilanayotgan Konstitutsiya mazmun-mohiyatini aholiga ayniqsa yoshlar o‘rtasida “tengdosh-tengdoshga” tamoyili asosida to‘g‘ri, sodda va aniq yetkazish, shuningdek Yoshlar parlamenti faoliyati bo‘yicha yangi tashabbuslar va fikrlarni yuzaga chiqarish, joylarda yoshlarning muammo hamda takliflarini o‘rgangan holda qonunchilikka yangi takliflarni kiritish ilgari surildi.
Masofadan tashkil etilgan muloqot davomida hududlardan saylangan Yoshlar parlamenti aʼzolari yoshlar hayotidagi muhim masalalar yuzasidan fikrlar bildirib, yangi taklif va tashabbuslar ilgari surildi.
Muloqot ochiq, konstruktiv ruhda yakunlandi hamda Yoshlar parlamenti aʼzolari faoliyatiga ulkan zafarlar tilandi.
Ma’lumotlar sheriklik huquqi asosida tayyorlandi.
Izoh (0)