Rafaello, quritilgan mevali konfet: Iftorlik uchun uyda tayyorlash mumkin bo‘lgan 5 xil shirinlik retsepti

Do‘kondagi o‘zingizga yoqqan shirinliklarni uyda tayyorlasangiz ham bo‘ladi, buning uchun vaqt, mahsulotlar va retsept kifoya. “Goryashaya izba” nashri uyda tayyorlash mumkin bo‘lgan 5 xil shirinlik retseptini taqdim etdi. Bu shirinliklar kattalarga ham, kichiklarga ham juda yoqadi. 

Mazali tryufel

Kerakli masalliqlar:

• achchiq shokolad — 200 g
• 30 foizli qaymoq — 200 g
• sariyog‘ — 25 gr
• kakao — 3 qoshiq
• shakar kukuni — 2 qoshiq

Tayyorlanishi:

1. Shokoladga qaymoq qo‘shib suv hammomida eritib oling. Massa eriganda sariyog‘ qo‘shing. Tryufellarni 8 soat davomida muzlatkichga qo‘ying.
2. Kakao va shakar kukunini aralashtiring.
3. Shokoladning bir qismini qoshiq bilan oling. To‘pchaga aylantiring va kakao kukuniga soling. Bu ishni darhol qilishingiz kerak, chunki shokolad qo‘lda juda tez eriydi. Shirinliklarni yarim soat davomida muzlatkichga qo‘ying.

 Rafaello

Kerakli masalliqlar:

• sariyog‘ — 130 gr
• kokos qirindisi — 130 gr va yana 4 qoshiq
• bodom — bir hovuch
• quyultirilgan sut — 4 osh qoshiq

Tayyorlanishi:

1. Eritilgan sariyog‘ni quyultirilgan sut va 130 gramm kokos qirindisi bilan aralashtiring. Massani yarim soat davomida muzlatkichga qo‘ying.
2. Bodomning po‘stlog‘ini tozalang. Buning uchun uni 5-10 daqiqa davomida qaynoq suvga solib qo‘ying. Keyin yuvib tashlang. Shunda bodomning po‘stlog‘i oson tozalanadi.
3. Konfetchalarni yasang. Har bir to‘pchaning ichiga bodom qo‘ying. Uni kokos qirindisiga botirib oling. Massani yarim soat davomida muzlatkichga qo‘ying.

Iris

Kerakli masalliqlar:

• Shakar — 200 gr
• 30 foizli qaymoq — 200 ml
• Sariyog‘ — 30 g
• asal — 3 osh qoshiq
• bir chimdim vanilin

Tayyorlanishi:

1. Barcha mahsulotlarni qalin tag qismiga ega bo‘lgan idishga soling. Ularni 30 daqiqa davomida o‘rtacha olovda vaqti-vaqti bilan aralashtirib, pishirib oling.
2. Uni biroz sovitib, silikon qoliplarga quying. Mahsulotlarni muzlatkichga 8 soat, muzxonaga 30-40 daqiqaga qo‘ying. Shirinliklar qolipdan osongina chiqishi kerak.

Quritilgan mevalardan tayyorlanadigan foydali shirinlik

Kerakli masalliqlar:

• quritilgan mevalar (mayiz, turshak, xurmo, anjir) 1 osh qoshiq
• yong‘oq (bodomdan foydalansangiz ham bo‘ladi) — yarim qoshiq.
• asal — 1 osh qoshiq
• limon — bir donaning uchdan bir qismi
• kunjut — 3-4 osh qoshiq

Tayyorlanishi:

1. Quritilgan mevalarni yuving va 20 daqiqa davomida qaynoq suvga soling. Keyin suvni to‘kib tashlang.
2. Quritilgan mevalar, yong‘oqlar va asalni blender idishiga soling. Limon sharbatini siqib chiqaring. Silliq massaga aylantiring.
3. Kichik dumaloq to‘pchalar hosil qiling. Har birini kunjutga botiring.

Qulupnayli zefir

Kerakli masalliqlar:

• olma — 3 dona
• bir hovuch qulupnay
• shakar — 150 gr
• agar-agar — 1 paket (7 g)
• tuxumning oqi — 2 dona
• limon kislotasi — bir qoshiqning uchdan bir qismi
• shakar kukuni

Tayyolanishi:

1. Olmani tozalang. Uni mikroto‘lqinli pechda yumshoq bo‘lguncha pishirib oling. Qulupnayni blenderda pyure holatiga kelgunga qadar maydalang. Sizga 250 ml qulupnay pyuresi kerak bo‘ladi. Agar kam bo‘lsa, uni suv bilan suyultirish mumkin.
2. Ikkita tuxum oqiga 50 gramm shakar va limon kislotasini qo‘shib, yaxshilab aralashtiring.
3. Meva pyuresi, 100 gramm shakar va agar-agarni qalin tagli idishga soling va 4 daqiqa davomida pishiring.
4. Tuxumning oqini aralashtirayotganingizda unga issiq pyureni qo‘shing.
5. Qandolat mahsulotlari uchun mo‘ljallangan paketga pyureni soling. Pyureni o‘zingizga yoqqan shaklda quyib oling. Ularni xona haroratida taxminan bir soat qoldiring, zefirlar qattiq holatga kelishi kerak.
6. Zefirning ustiga shakar kukunini seping.

Yoqimli ishtaha!