Davlat soliq qo‘mitasi yer va mol-mulk solig‘i haqida yuborilayotgan xabarnomalar bo‘yicha izoh berdi
O‘zbekistonda ayrim fuqarolar yer va mol-mulk solig‘i haqida DSQ tomonidan yuborilgan xabarnomalarni firibgarlarning yana bir tuzog‘i sifatida qabul qildi. Qo‘mita bunga munosabat bildirdi.
Qayd etilishicha, soliq to‘lovchilar uyali telefonlariga 6079 raqamidan yuborilgan hisoblangan yer va mol-mulk solig‘i haqidagi xabarnomaning havolasiga bosilganda foydalanuvchi bank kartasidan pul yechib olinishi to‘g‘risida ijtimoiy tarmoqlarda tarqalayotgan xabarlar asossiz.
“Aslida Soliq qo‘mitasi soliq to‘lovchilarga qulaylik yaratish maqsadida ularning uyali telefonlariga 6079 raqamidan hisoblangan va to‘lanishi lozim bo‘lgan yer va mol-mulk soliqlari to‘g‘risidagi maʼlumotlarni SMS ko‘rinishida yubormoqda”, — deyiladi xabarda.
Qo‘mitaning bildirishicha, “Batafsil” yozuvidagi havola orqali to‘lov xabarnomasi yuklanadi. “To‘lash” yozuvi bosilganda esa “Soliq” mobil ilovasi joylangan platforma (Play Market) ochiladi. Agar ilova foydalanuvchi qurilmasiga o‘rnatilgan bo‘lsa ilovaning “Soliqlarni to‘lash” oynasidan to‘lovni tez va oson amalga oshirish mumkin.
