Yevrokomissiya rahbari Ursula fon der Lyayen NATO bosh kotibi lavozimiga da’vogarlik qilmoqda — OAV

Yevrokomissiya rahbari Ursula fon der Lyayen sentabr oyida Yens Stoltenberg vakolati tugashi munosabati bilan NATOning yangi bosh kotibi lavozimi uchun kurashda ishtirok etmoqchi. Bu haqda The Sun gazetasi manbalarga tayanib xabar berdi.

Manbalarda aytilishicha, NATOga a’zo davlatlardan ayrimlari oktabr oyidayoq fon der Lyayenni alyansga rahbarlik qilishga chaqirgan. Shu bilan birga, uning Yevrokomissiya raisi sifatidagi vakolatlari keyingi yildagina tugaydi.

Nashrning ta’kidlashicha, fon der Lyayenning tayinlanishiga yevroskeptiklar, birinchi navbatda, Buyuk Britaniya tomonidan qarshilik ko‘rsatilishi mumkin. London NATOning boshqa aʼzolari eʼtiborini fon der Lyayenning 2013—2019-yillarda Germaniya Mudofaa vazirligida ishlagan paytidagi past ko‘rsatkichlariga qaratmoqchi.

Bunga qadar OAV Estoniya bosh vaziri Kaya Kallas, Kanada bosh vaziri o‘rinbosari va moliya vaziri Xristi Friland va Buyuk Britaniya mudofaa vaziri Ben Uollesning NATO bosh kotibi lavozimiga da’vogarlar sifatida ko‘rilayotgani haqida xabar bergandi.