Qashqadaryo viloyatida qurilgan namunali uylar qulab tushish arafasida ekani aytilmoqda (video)

Qashqadaryo viloyatining Kitob tumanidagi Rus qishloqda qurilib, aholiga topshirilgan namunali uy-joylar qulab tushish arafasida ekani aytilmoqda. Bu haqda aholi videochiqishda maʼlum qilgan.

Mazkur videoda Rus qishlog‘ida joylashgan xonadonlarning biridagi vaziyat tasvirlangan.

“Uy devorlari yorilib, siljigani sabab eshiklar yopilmaydigan bo‘lib qolgan. Plitalar siljib, devor orasidan narigi tomon ko‘rinadi. Uy qulab tushib, xonadon vakillarini bosib qolishi ham mumkin”, — deydi videochiqishdagi fuqarolar.

Aytilishicha, uy devorlarining siljishi oqibatida xonadondagi elektr simlari ham tortilib, uzilgan.

Video davomida aytilishicha, uyning poydevori ham siljigan.

“Bu uyni buzib tashlamasa, yashash uchun juda xavfli. Bu yerdagi aksariyat uylar shu ahvolda”, — deydi video muallifi.

Murojaatchilarning aniqlik kiritishicha, ushbu namunali uylar 2017—2018-yillarda qurilib, 20 yil muddatga ipoteka krediti evaziga aholiga topshirilgan.

“Ayni paytda oyma-oy 2 milliongacha bo‘lgan kredit pullarini to‘lab kelyapmiz. Lekin ega bo‘lganimiz ertaga qulab tushishi mumkin bo‘lgan qo‘rqinchli uy bo‘lyapti. Bu ahvolda qanday yashashaymiz”, — deydi ushbu xonadon egasi Nigora Xudoyqulova.

Nigora Xudoyqulovaning aytishicha, u ushbu xonadonni 2018-yil sentabr oyida qabul qilib olgan.

“‘Asaka bank’ka oyma-oy kredit to‘lab kelyapmiz. Uyimiz shunday yorilib ketgach, bank rahbariyatiga ham, quruvchiga ham vaziyatni bildirib, menga boshqa uy berilishi kerakligini, kredit to‘lovini to‘lamasligimni aytib, fevral-mart oylaridagi to‘lovini to‘lashdan bosh tortdim. Bank xodimlari esa uy qulab tushsa ham, kredit pulini to‘lashga majbursiz deb, kredit to‘loviga penya ham hisoblashmoqda. Quruvchi Sanjar G‘aniyev esa devorlarni yamab beraman deydi. Bu uy devorining yorig‘ini yamasa ham foydasi yo‘q-ku, bu uyda yashash o‘limni bo‘yinga olish-ku”, — deydi uy egasi.

“Daryo” voqealar rivojini kuzatishda davom etadi.