Pentagon AQSH va Xitoy o‘rtasida harbiy mojaro boshlanishi ehtimolini baholadi
AQSH va Xitoy o‘rtasida harbiy mojaro bo‘lishi mumkin, ammo hozircha buning ehtimoli deyarli yo‘q, dedi AQSH shtablari boshliqlari birlashgan qo‘mitasi raisi, general Mark Milli Defence One nashriga bergan intervyusida.
Uning ta’kidlashicha, Xitoyda ham, AQSHda ham “yaqinda urush bo‘ladi” yoki ikkala tomon ham “urush yoqasida”, degan taassurot uyg‘otuvchi ko‘plab ritorikalar mavjud.
“Bu chindan ham sodir bo‘lishi mumkin. Aytmoqchimanki, nazoratdan tashqari avj olib ketadigan voqea yoki boshqa mojaro qo‘zg‘atuvchi hodisa yuz berishi mumkin. Ammo hozircha men buni ehtimoliy deb tasniflamayman”, — dedi Milli.
Shuningdek u AQSH Tayvanga imkon qadar tezroq qurol jo‘natishi zarurligi haqidagi chaqiriqlarga qo‘shilishini bildirdi.
Milli AQSH Xitoy—Rossiya harbiy ittifoqidan xavotirda, degan gaplarga erta ekanini aytdi. General ayrim belgilar borligiga qaramasdan, Rossiya—Xitoy yaqinlashuvi haqiqiy ittifoqdan juda farq qilishini taʼkidladi.
Tayvan 1949-yilda Xitoydan mustaqilligini e’lon qilgan. Pekin hamon orolni o‘zining bo‘lginchi viloyati deb biladi. 2022-yilning kuzida AQSH Markaziy razvedka boshqarmasi direktori o‘rinbosari Devid Koen Xitoy rahbari Si Szinpin o‘z harbiylariga 2027-yilgacha Tayvan ustidan harbiy nazorat o‘rnatishga tayyorgarlik ko‘rishni buyurganini aytgandi. Pekin orol bilan “tinch yo‘l orqali birlashish” niyatini ham bildirgan.
