O‘zbekistonda xodimlar “Tashabbusli budjet”ga ovoz yig‘ish uchun majburiy jalb qilinayotgani o‘rganilmoqda. Bu haqda Senat axborot xizmati xabar berdi.
“Tashabbusli budjet” loyihasi davlat budjetining shakllanishi va hududlarni ijtimoiy-iqtisodiy rivojlantirish jarayoniga aholini faol jalb etish hamda joylardagi dolzarb muammolarni hal etishda jamoatchilik ishtirokini kengaytirish maqsadida yo‘lga qo‘yilgan.
O‘tgan qisqa davr mobaynida joylarda ushbu loyiha doirasida ko‘plab ijobiy ishlar amalga oshirilmoqda. Shu bois mazkur jarayon ommalashib bormoqda. Shu bilan birga ijtimoiy tarmoqlarda “Tashabbusli budjet” uchun ayrim soha vakillarining ovoz yig‘ish ishlariga jalb qilinganligi holatlari keng muhokama qilinmoqda.
“Mazkur masala Odam savdosiga va majburiy mehnatga qarshi kurashish komissiyasi tomonidan atroflicha o‘rganilmoqda. Natijalar bo‘yicha qo‘shimcha ma’lumot beriladi. Majburiy tarzda biror bir mehnatga jalb etish bilan bog‘liq muammolarga duch kelgan yoki mazkur holatdan xabardor bo‘lgan yurtdoshlarimizni mk@senat.uz, 1176 hamda 1092 raqamli ishonch telefonlariga murojaat qilishlarini so‘raymiz", — deyiladi xabarda.
Izoh (0)