Kino ishqibozlari typecasting nimaligini yaxshi bilishadi, ya’ni tipajga ko‘ra aktyorlarni tanlash. Oddiy qilib aytganda, bu aktyorlarga rejissorlarning tashqi ko‘rinishi va xarakteriga mos keladigan bir xil turdagi rollarni taklif qila boshlaydigan holat. Ba’zan bunday aktyorlarni bitta obrazga bog‘lanib qolgan deb atashadi.
Kira Naytli
Kira Naytli tarixiy qahramonlar rolida juda tabiiy ko‘rinadi. “Poklanish” , “Gersoginya”, “Karib dengizi qaroqchilari” franshizasida ham uning qahramonlari har doim tashqi tomondan kamtar ayollar bo‘lib, ular ichida isyonkor ruh doimo yonib turadi. Aktrisa tarixiy filmlarga bo‘lgan bog‘liqligini bugungi kun haqidagi ssenariylarda yetishmaydigan kuchli va ilhomlantiruvchi ayollarni yaxshi ko‘rishi bilan izohlaydi.
Bundan tashqari, aktrisaning tan olishicha, tarixiy spektakllarda rol o‘ynash uning uchun boshqa voqelikka o‘tish usulidir.
Skarlett Yoxansson
“Nikoh tarixi” va “Tarjima mashaqqatlari” filmlarining sujeti oilaviy munosabatlardagi qiyinchiliklarga asoslangan. Ularning har birida Yoxansson nikohidan qoniqmayotgan ayol rolini ajoyib tarzda o‘ynaydi.
Ehtimol, aktrisa uchun bunday rollarga moslashish qiyin emasdir, chunki ularda o‘z hayoti aks etadi. Aktrisaning ota-onasi u o‘smirligida ajrashishgan, aktrisaning o‘zi ham bir necha bor ajrashgan. “Nikoh tarixi”ning ssenariysi ikkinchi turmushidan ashrashish jarayonining eng yuqori cho‘qqisida uning qo‘liga kelib tushadi.
Emma Uotson
Aktrisa Garri Potter franshizasidan keyin qanday filmlarda suratga tushmasin, tomoshabinlar o‘sha Germiona Grenjerni – zukko, qiziquvchan, a’lochi, biroz takabbur, biroz isyonkor qizni tomosha qilayotgandek tuyg‘udan xalos bo‘lishlari qiyin edi. Biroq bu fazilatlar nafaqat aqlli sehrgar qizga, balki Uotsonning o‘ziga ham tegishli.
Uning qahramonlari singari real hayotda Emma ham o‘z aql-zakovati va shon-shuhratini yaxshilik uchun ishlatib, zamonaviy odamlarning muayyan dolzarb masalalar bo‘yicha qarashlarini o‘zgartirishga harakat qiladi. Ekofaol, tenglik faoli, xayriyachi - u, albatta, bir joyda o‘tirishga odatlanmagan va o‘z qahramonlari kabi jamoat hayotida faol ishtirok etadi.
Jennifer Eniston
Jennifer Eniston juda ko‘p romantik komediyalarda rol o‘ynagan, uning qahramonlari juda ko‘p o‘xshashliklarga ega ekanligini sezmaslik qiyin. Odatda u o‘z hayotini tuzatishga harakat qilayotgan oddiy, maftunkor, kambag‘al qizlarni o‘ynaydi.
Aftidan, bu xususiyatlar haqiqiy Jenniferga tegishli. Shon-shuhrat va boylikka qaramay, u hali ham birovga o‘xshab ko‘rinishga urinmaydigan, boshqalar bilan oson til topishib ketadigan, yaxshi xulqli, samimiy va mehnatkash ayol bo‘lib qolmoqda.
Melissa Makkartni
Aytish mumkinki, Melissa Makkartni aqlli, maqsadli va jiddiy ayol rolini o‘ynamaydi. Ko‘pincha unga o‘z qahramonlarida bo‘lgani kabi ishonch bildirishmaydi, lekin aktrisa yoshi va go‘zallik me'yorlariga mos kelmasligiga qaramay, kinosanoatda o‘ziga xos o‘rin tutadi.
Ehtimol, aynan mana shu ichki isyon va munosib rollarni tanlash unga bir necha yillar davomida diqqat markazida qolishga va eng ko‘p maosh oladigan komediya yulduzlaridan biri bo‘lishga imkon bergandir.
Enn Xeteuey
Garchi Xeteueyning ba'zi qahramonlari tomoshabinni hamdardlik ko‘z yoshlarini to‘kishga majbur qilsa-da, odatda ular dramatiklik bilan emas, balki xayolparastlik, zaiflik, mehribon qalb va, albatta, ko‘zni qamashtiruvchi tabassumi bilan ajralib turadi.
Aktrisaning o‘zi haqida ham shunday deyish mumkin: har qanday intervyu va shoularda, birinchi navbatda, odamlar uning yorqin tabassumini ko‘rishadi. Ko‘rinib turibdiki, aynan shunday qahramonlar Ennning shaxsiyati bilan rezonanslashgani uchun u bu rollarni juda oson o‘ynaydi.
Ketrin Xeygl
Ketrin Xeygl romantik komediyalarning yana bir markaziy figurasidir. Qahramonlarining xususiyatlari — prinsiplarga sodiqlik va nazoratga berilish. Ammo aktrisa haqiqatan ham shunday ekanini tushuna boshlaganingizda hammasi joyiga tushadi.
Helena Bonem Karter
Faoliyatining boshida aktrisaga doimo muloyim ayollarni o‘ynash taklif qilingan. Biroq hozir kamdan kam istisnolardan tashqari, biz Helena Bonem Karterni qonun va qoidalarni tan olmaydigan eksentrik, aqldan ozgan ayollar rollarida ko‘ramiz.
Uning tan olishicha, u uchun aktrisalik qilish haqiqiy hayotdan qochish, uning farovonligi uchun foydali terapiya turidir.
Izoh (0)