O‘zbekistonda yarim yil ichida 50 ta ko‘p qavatli uylar (to‘qqiz qavatli va undan ortiq) loyihalarining faqat uchtasi ma’qullangan. Qolganlari seysmik talablarga javob bermagan va qayta ishlash uchun yuborilgan. Bu haqda “Yangi O‘zbekiston” gazetasida e’lon qilingan maqolada so‘z boradi.
Mexanika va inshootlarning seysmik mustahkamligi instituti direktori Karim Sultonovning so‘zlariga ko‘ra, institut oldiga qo‘shimcha vazifa qo‘yilgan: to‘qqiz qavat va undan yuqori balandlikda qurilishi rejalashtirilgan to‘rtinchi toifadagi binolarning barqarorlik darajasini qayta tekshirish.
“O‘tgan yil sentabrdan boshlab tadqiqotlar amalga oshirilmoqda. Shunday ekan, qariyb 50 ta loyihadan uchtasi tasdiqlandi, qolganlari qayta ishlash uchun qaytarildi. Shu bilan birga, institut o‘z oldiga O‘zbekistonda baland binolarni qurishni taqiqlash maqsadini qo‘ymagan. Uning vazifasi — aholining maksimal xavfsizligini ta’minlash”, — deydi Karimov.
Qurilishda texnik me’yorlash va standartlashtirish ilmiy-tadqiqot instituti direktori o‘rinbosari Abulqosim Abduxoliqovning qo‘shimcha qilishicha, qurilish 320 dan ortiq norma hamda 2 mingdan ziyod standartlar asosida amalga oshirilmoqda. Ular mumkin bo‘lgan seysmik faollikni hisobga olgan holda sifat talablarini ta’minlaydi.
Avvalroq O‘zbekistonda so‘nggi 10 yilda olti marotaba 6-8 balli zilzila sodir bo‘lgan va ular natijasida yetkazilgan iqtisodiy zarar 84 milliard so‘mni tashkil etgani to‘g‘risida xabar berilgandi.
Izoh (0)