Shavkat Mirziyoyevning topshirig‘i asosida mamlakatda og‘ir kasalliklarga chalingan minglab bemorlarda murakkab operatsiyalarni o‘tkazish uchun qariyb 90 milliard so‘m ajratildi. Sog‘liqni saqlash vazirligi ushbu mablag‘lar sarflanishi bo‘yicha ma’lumot berdi.
Qayd etilishicha, yuqori texnologik amaliyotlarning sarflov vositalari narxi butun dunyoda qimmat. Masalan, son suyagi, yelka, tizza bo‘g‘imlarining yemirilishi bilan bog‘liq xastaliklarni davolashda qo‘llaniladigan endoprotez moslamalari bahosi O‘zbekistonda o‘rtacha 18-20 million so‘mga teng.
Aksiya doirasida sog‘lomlashtiriladigan bemorlar ikki toifaga ajratilgan.
Birinchi guruh — tug‘ma yurak nuqsonidan aziyat chekayotgan bolalar. Ularning soni — 2 ming nafar. Barchasi ijtimoiy himoyaga muhtoj oilalarning 18 yoshgacha bo‘lgan farzandlari.
Ana shu o‘g‘il-qizlar jami 64 milliard so‘mdan ziyod mablag‘ evaziga navbatsiz, imtiyozli yo‘llanmasiz, eng malakali shifokorlar tomonidan yuqori texnologik operatsiyalar orqali og‘ir darddan xalos etiladi.
Jarrohlik amaliyotlari Bolalar milliy tibbiyot markazi, akademik V.Vohidov nomidagi Respublika ixtisoslashgan xirurgiya ilmiy-amaliy tibbiyot markazi, Toshkent pediatriya tibbiyot instituti klinikasi, Samarqand, Namangan, Farg‘ona, Andijon viloyatlari bolalar ko‘p tarmoqli tibbiyot markazlari, Respublika ixtisoslashtirilgan kardiologiya ilmiy-amaliy tibbiyot markazi Urganch filialida o‘tkazilmoqda.
Ikkinchi guruhga mansub bemorlar — kattalar. Ularda bajariladigan tezkor operatsiyalar uchun davlat 22 milliard so‘m ajratgan.
Bemorlar ro‘yxati tegishli ishchi guruh, joylardagi Xalq qabulxonalari, mahalla faollari ishtirokida, xonadonma-xonadon o‘rganishlar natijasida adolatli ravishda shakllantirilgan.
“Bu toifaga imtiyozli yo‘llanmaga ega bemorlar kiritilmadi. Negaki, ularning davolanish sarf-xarajatlari shundoq ham davlat tomonidan qoplanadi. Muolajalar davri, tibbiyot muassasalari belgilab qo‘yilgan. Demak, ularni sog‘lomlashtirishda muammolar yuzaga kelmaydi”, — deyiladi SSV xabarida.
Hozir aksiya doirasida moddiy imkoniyati cheklangan bemorlarda endoprotezlash, kardioxirurgik, urologik, endokrinologik va ichki aʼzolarni ko‘chirib o‘tkazish kabi noyob va murakkab operatsiyalar o‘tkazish boshlangan.
Izoh (0)