Toshkent shahrida 30-mart — Xalqaro chiqindisiz kun munosabati bilan keng jamoatchilik bilan birgalikda yugurish orqali chiqindilarni saralab yig‘ish – “plogging” tadbiri bo‘lib o‘tdi, bu haqda “Daryo” muxbiri xabar bermoqda.
Tadbirda Tabiat resurslari vazirining birinchi o‘rinbosari Obidjon Qudratov so‘zga chiqib, chiqindilar sektori iqlim o‘zgarishi, biologik xilma-xillik nobud bo‘lishi hamda atrof muhitning ifloslanishiga sabab bo‘layotganini alohida taʼkidlab o‘tdi.
“Statistik maʼlumotlarga ko‘ra, mamlakatimiz bo‘yicha bir kunda 19-20 ming tonna chiqindi hosil bo‘lmoqda. Chiqindilar turli xil metallar, shisha idishlar, makulatura, plastik va oziq-ovqat mahsulotlari qoldiqlaridan iborat bo‘lib, ularning faqat 32 foizi qayta ishlanmoqda”, — dedi Obidjon Kudratov.
Ishtirokchilar Toshkent shahridagi “Zero Waste” aksiyasi doirasida Mirzo Ulug‘bek tumani Istiqlol va Maxtumquli ko‘chalari chorrahasida joylashgan istirohat bog‘ida aksiya ishtirokchilari hududdagi plastik butilkalar, alyumin bankalar, makulatura va o‘ramlardan tozaladi.
Bugungi kunda dunyo miqyosida chiqindilar muammosi eng dolzarb ekologik masalalardan biriga aylanib ulgurgan. Shu bois, Turkiya davlati 105 ta boshqa davlatlar bilan birgalikda butunjahon chiqindisiz kunini belgilash haqidagi rezolyutsiyani qabul qilish tashabbusini ilgari surdi va Birlashgan Millatlar Tashkiloti Bosh Assambleyasi 2022-yil 14-dekabrdagi majlisida 30-martni har yili nishonlanadigan “Xalqaro chiqindisiz kun” deb eʼlon qilish to‘g‘risida rezolyutsiyani qabul qilgan.
Urbanizatsiya jarayoni jadallashib, shaharlar kengayayotgan, aholi soni o‘sayotgan va uning ehtiyojini qondirish uchun millionlab turdagi tovarlar ishlab chiqarilayotgan bir paytda chiqindilarni qayta ishlash va ularning utilizatsiyasi eng katta ekologik muammolardan biri bo‘lib qolmoqda.
Aholi tomondan qattiq maishiy chiqindilarni duch kelgan yerlarga tashlab ketish, aholi punktlarida, magistral yo‘l yoqalarida, dala maydonlari chetlarida, suv havzalari qirg‘oqlarida noqonuniy chiqindixonalarning hosil bo‘lishi davom etmoqda. Hususan, 2020-yil 28,9 ming, 2021-yil 18,7 ming, 2022-yilda 20,3 ming nafardan ziyod fuqarolar chiqindilarni belgilanmagan joylarga tashlaganligi uchun maʼmuriy huquqbuzarliklar aniqlangan.
Izoh (0)