Ijtimoiy tarmoqlardagi hazil videolari bilan muxlislar e’tiboriga tushgan Bobur Mansurov 29-mart kuni 31 yoshni qarshiladi. Ijodda o‘z o‘rnini topguniga qadar kabobpaz va ofitsiant bo‘lgan aktyor, birinchi vaynini suratga olishdan roppa-rosa 10 kun avval Rossiyaga ishlagani ketmoqchi bo‘lgan.
Bobur Mansurov bolaligidan san’atga qiziqqan. Ammo oiladagi sharoit sabab san’at to‘garaklariga qatnashishga imkoni bo‘lmagan. U yashaydigan qishloq Tojikiston bilan chegaradosh hududda bo‘lgan. Bu yerlik aholi chorvachilik va dehqonchilik bilan shug‘ullangan. Bo‘lajak aktyor ham boshqa bolalar singari bolalikdan ro‘zg‘orga ko‘maklashgan.
— Sirdaryo viloyatida oddiy ishchilar oilasida dunyoga kelganman. Onam asli o‘shlik, dadam esa sirdaryolik bo‘lgan. Oilamizda qiz yo‘q, besh o‘g‘ilmiz. Shu boisdan ham bolaligimizdan mehnat qilishga o‘rganganmiz. Dadam kabobpaz bo‘lsa-da, barchamizni oliy ma’lumotli qilgan. Onam ham o‘qishni orzu qilardi. Hammamiz oliy ma’lumotli bo‘lganimizdan keyin o‘zi ham institutga hujjat topshirib, 50 yoshida talaba bo‘ldi, — deydi Bobur Mansurov.
Bobur Mansurovning dadasi choyxonada kabobpaz bo‘lib ishlagan. Bo‘lajak aktyor darsdan keyin dadasining ish joyiga borib, unga ko‘maklashgan.
— Kabob pishirish, uning tuz-namagini to‘g‘rilash qo‘limdan keladi. Chunki ancha vaqt dadam bilan birga choyxonada ishlaganman, — deydi Bobur Mansurov.
Aktyor bolalikdan qo‘shiqchi bo‘lishni orzu qilgan. Ammo Sirdaryodagi san’at kollejida xonandalik bo‘limi bo‘lmagani uchun drama aktyorligi bo‘limida o‘qishga majbur bo‘lgan. O‘qish davomida aktyorlikka mehri ortib, katta orzu-umidlar bilan O‘zbekiston davlat san’at va madaniyat institutiga hujjat topshirgan.
— Ijodiy imtihondan keyin barcha orzu-umidlarim chil-parchin bo‘lgan. Chunki men o‘z mahoratimga ishonardim. Ammo ikki yilgi imtihonda ham eng past ballni o‘zim olganman. Birinchi yil ijodiy imtihondan 13, keyingi yil esa 8 ball olganman. Bu umuman iste’dodsiz aktyorsan, degandek gap edi, — deydi Bobur Mansurov.
Ketma-ket imtihonlardan yiqilgan Bobur Mansurov o‘zini tadbirkorlik sohasida sinab ko‘rmoqchi bo‘ladi. Qishloq markazida Paynet shoxobchasini ochadi. Ammo ko‘p o‘tmay shaxobcha bankrotga uchraydi. Yaqinlari unga harbiy xizmatga borishni tavsiya qilishadi.
— San’atdan butunlay ko‘nglim qolgan. “Qo‘limdan hech narsa kelmaydi, iste’dodsizman” deb tushkunlikka tushgandim. Ustiga ustak, birinchi yil harbiy xizmatga qabul qilishmadi. Qon bosimim borligi xalal berdi. Kelasi yil esa bir yillik xizmatga qabul qilinib, Farg‘onaga yo‘l oldim, — deydi Bobur Mansurov.
.jpg)
San’atga oshufta ko‘ngil har qanday sharoitda ham ijod qilishga imkon topadi. Bobur Mansurovning san’atga qiziqishini bilgan komandirlar uni harbiy qismlar o‘tkaziladigan tanlovlarda ishtirok etishini so‘rashadi. Muvaffaqiyatli ishtirokidan so‘ng, jamoa bilan birga harbiylar o‘rtasidagi QVZda ishtirok etishni taklif qilishadi. Komandirlar “Agar g‘olib bo‘lsang, imtiyoz olishing mumkin”, deyishadi. Institutga kirish ishtiyoqi so‘nmagan Bobur Mansurov jamoasi bilan astoydil mehnat qilib, ikkinchi o‘rinni qo‘lga kiritadi.
— Harbiy xizmatni imtiyoz bilan yakunlaganman. Akam Jahon tillari universitetiga hujjat topshirishimni so‘ragan. Chunki oila a’zolarim ham san’atkor bo‘lishimdan umidlarini uzishgan edi. Akamdan yashirincha san’at institutiga hujjat topshirganman. Ammo ijodiy imtihondan past ball olganman. Imtiyoz sabab shartnoma asosida o‘qishga qabul qilinganman, — deydi Bobur Mansurov.
Aktyor O‘zbekistonda xizmat ko‘rsatgan madaniyat xodimi Munavvara Abdullayeva qo‘lida tahsil oladi. U iste’dodli ekanligini isbotlash uchun darslarda faol bo‘lishga va kastinglarda ishtirok etishga harakat qiladi. Ajablanarlisi shundaki, Bobur Mansurov 8 yil davomida birorta kastingdan o‘tmaydi.
— Hamma kursdoshlarim kastinglardan o‘tishardi. Ammo men biror marta epizod bo‘lsa-da rolga qabul qilinmaganman. “Ko‘rinishim yoqmaydimi, shunchalik xunukmanmi?” deb o‘z-o‘zimga savol berardim. Hatto bir serialning kastingidan barcha kursdoshlarim o‘tishgan, men esa o‘tolmaganman. Bir tomondan kursdoshlarimning yutug‘idan quvondim, boshqa tomondan esa ichimda g‘alati g‘alayon bo‘lgan, — deydi Bobur Mansurov.
Birorta rolga tasdiqlanmagan ijodkor xususiy telekanallarning biriga ikkinchi rejissor sifatida ishga kiradi. Ammo u to‘rt oy ishlab, umuman haq olmaydi. Lekin tajriba orttirib, keyinchalik o‘zi mustaqil serialga rejissorlik qiladi.
— “Orzular palatasi” nomli serialga rejissorlik qilganman. Davlat bujeti asosida suratga olingan serial — ilk mustaqil ishim bo‘lgan. Shuning uchun ham kamchiliklari yetarlicha, — deydi Bobur Mansurov.
Bobur Mansurov moliyaviy qiyinchiliklarga ko‘p uchragan ijodkor hisoblanadi. Shuning uchun ham vayner bo‘lishdan avval o‘zini butunlay boshqa sohalarda ham sinab ko‘rgan.
— Puldan yetishmovchilik hamisha bo‘lgan. Musofirchilikda tahsil olgan talabalar buni juda yaxshi bilishadi. Uydagilardan pul so‘rashga uyalib, ofitsiantlik qilganman. Ammo qiyinchilikning eng zo‘ri institutni bitirgandan keyin bo‘lgan. San’atkorlarning oyligi juda kam, syomkalarga umuman chaqirishmaydi. Ammo yashashingiz uchun hamisha pul kerak. San’atda kelajagimni ko‘rmaganimdan keyin Rossiyaga ishlagani ketmoqchi bo‘lganman. Falon kunga samolyot bor ekan deb hujjatlarni taxt qilib turganimda kursdoshlarim vaynerlik qilish taklifini berishgan, — deydi Bobur Mansurov.
Bir qarashda vaynerlik oson ko‘rinsa-da, professional aktyorlarning ko‘pi bu ishni o‘ziga ep ko‘rishmaydi. Bobur Mansurov ham to‘rt yil vayner bo‘lish uchun institutda o‘qidingmi, degan gaplardan qo‘rqib, olti oygacha videolarni ommaga chiqarmagan.
— Ikkilanganmiz, videolar shaxsan menga umuman yoqmagan. Shu bois bir necha oy ularni ommaga chiqarmaganmiz. Ibrat ismli kursdoshim sabab bo‘lib ilk videolarimiz Instagram’ga joylangan, —deydi Bobur Mansurov.
Bobur Mansurov oddiy odamlar haqida hazil videolar suratga olishi bilan boshqa vaynerlardan farq qiladi. Chiqindixonadagi motivator, qurumsoq oshiq haqidagi videolar shular jumlasidan.
— Voqealarning ko‘pi men yoki do‘stlarimning hayotida sodir bo‘lgan. Hatto chiqindixonadagi motivator voqeasiga duch kelganimdan keyin shu haqida video olishga qaror qilganmiz. Mahallamizdagi chiqindixona juda mashhur bo‘lib ketdi, shunday kunlar ham keldiki, u yerda video olishimizga ruxsat berishmadi, — deydi Bobur Mansurov.
Bobur Mansurov do‘stlari bilan ijara uyda yashashini yashirmaydi. U kamtarona hayot kechiradi va bundan uyalmaydi. 2022-yilda unga qurilish kompaniyalaridan biri reklama qilish sharti bilan ikki xonali uy sovg‘a qilgan. Vayner 2023-yilda oila qurib, rafiqasi bilan yangi uyda yashashni niyat qilmoqda.
Izoh (0)