BMT sudi “noqonuniy sanksiyalar” uchun AQSH Eronga tovon to‘lashi haqida hukm chiqardi
Birlashgan Millatlar Tashkiloti Xalqaro sudi Eronning xorijiy aktivlarni muzlatish masalasida AQSHga qarshi da’vosini qisman qanoatlantirdi. Endi Vashington Tehronga kompensatsiya to‘lashi kerak. Bu haqda BMT matbuot xizmati xabar berdi.
Sud instansiyasi xulosasiga ko‘ra, Qo‘shma Shtatlar Eronning xorijiy aktivlarini muzlatib, 1955-yilda mamlakatlar o‘rtasida tuzilgan do‘stlik shartnomasi bo‘yicha o‘z majburiyatlarini buzgan. Shu bilan birga, Eron va AQSH o‘rtasidagi munosabatlar 1979-yilgi Islom inqilobidan keyin dushmanlik tusini olgan, AQSH kelishuvdan faqat 2018-yilda — ko‘plab sanksiyalar paketi kiritilgandan keyin chiqishga qaror qilgandi.
Sud Vashingtonning do‘stlik kelishuvidan chiqmasdan turib ayrim Eron kompaniyalari aktivlarini muzlatib qo‘ygani, ya’ni “noqonuniy sanksiyalar” uchun Tehronga tovon puli to‘lashi haqida hukm chiqardi. Kompensatsiya miqdori va to‘lash tartibini mamlakatlar o‘zlari hal qilishi kerak. Agar ular kelgusi ikki yil ichida kelisha olmasa, sudyalar bu masalani alohida ko‘rib chiqadi.
BMT Xalqaro sudining qarorlari majburiydir va shikoyat qilinishi mumkin emas. Shu bilan birga, sudda mamlakatlarni ushbu qarorlarni bajarishga majburlash mexanizmlari mavjud emas. Ilgari AQSH ham, Eronning o‘zi ham BMT sudining boshqa qarorlarini e’tiborsiz qoldirgan.
