Xorazm viloyatining ikki tumanida qalbaki aksiz markali qariyb 700 dona alkogol mahsuloti savdosi to‘xtatildi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, Bosh prokuratura huzuridagi departamentning Yangiariq tuman bo‘limi tomonidan o‘tkazilgan tergovga qadar tekshiruvda, “E.D.” MCHJ qarashli savdo shoxobchasida qalbaki aksiz markali 434 dona alkogol va 28 quti aksiz markasiz “Milano” nomli tamaki mahsulotlari sotuvga qo‘yilgani aniqlanib, ashyoviy dalil sifatida olingan.
Xuddi shunday departamentning Shovot tuman bo‘limi tomonidan o‘tkazilgan tergovga qadar tekshiruvda, “U.O.” MCHJga qarashli savdo shoxobchasida qalbaki aksiz markali 3 xil turdagi 261 dona alkogol mahsulotlari sotuvga qo‘yilgani aniqlanib, ashyoviy dalil sifatida olingan.
Maʼlum qilinishicha, mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)