Ta’lim muassasalarida halok bo‘lgan harbiy xizmatchilarning jasorati targ‘ib qilinadi
O‘zbekistonda ta’lim muassasalarida halok bo‘lgan harbiy xizmatchilarning jasorati targ‘ib qilinadi. Bu haqda Mudofaa vazirligi axborot xizmati ma’lum qildi.
Prezidentning tegishli farmoni bilan ofitserlar tarkibidagi halok bo‘lgan harbiy xizmatchilarning nomlari Mudofaa vazirligi oliy harbiy ta’lim muassasalariga biriktirildi.
Mudofaa vazirligi tizimida Vatan himoyasi va tinchligi yo‘lida halok bo‘lgan harbiy xizmatchilar oilalari harbiy qism va muassasalar tomonidan otaliqqa olindi. Shuningdek, halok bo‘lganlarni biriktirilgan harbiy qism, muassasalarning bo‘linma shaxsiy tarkibi ro‘yxatiga kiritish hamda tungi yo‘qlama vaqtida ularning nomlarini muntazam o‘qib eshittirish kabi ishlar ko‘zda tutilgan.
Bundan tashqari, halok bo‘lgan harbiy xizmatchilar va xodimlarning oila a’zolariga belgilangan imtiyoz va kafolatlarni tatbiq etish tartibini belgilovchi normativ-huquqiy hujjatlar hamda “Faxriylar to‘g‘risida”gi, “Harbiy xizmatchilar maqomi va ularni ijtimoiy himoya qilish to‘g‘risida”gi va “Harbiy xizmatchilarning pensiya ta’minoti to‘g‘risida”gi qonunlari loyihalarini ishlab chiqilmoqda.
