Rossiyada urushga qarshi rasm chizgan qizning otasi 2 yillik koloniyaga hukm qilindi
Rossiyada urushga qarshi rasm chizgan 6-sinf o‘quvchisi Masha Moskalyovaning otasi Aleksey Moskalyov ikki yillik koloniyaga hukm qilindi. “Mediazona” xabariga ko‘ra, bunday qaror Tula viloyati Yefremov tumanlararo sudi tomonidan qabul qilingan. U Rossiya armiyasini qayta-qayta “obro‘sizlantirish” moddasi bo‘yicha sudlangan. Sudya, shuningdek, Moskalyovning qizi ijtimoiy xizmatlar qaramog‘iga o‘tkazilayotganini e’lon qildi. Prokuratura Moskalyovga nisbatan ikki yillik qamoq jazosini talab qilgan.
Moskalyovning o‘zi hukm e’lon qilingan majlisda ishtirok etmagan. Sud matbuot kotibi Olga Dyachukning aytishicha, u hukm chiqarilishidan oldingi kun, 27-mart kechasi “uy qamog‘idan qochib ketgan”.
2022-yil aprel oyida Masha Moskalyova rasm darsida “Urushga yo‘q” va “Ukrainaga shon-sharaf” yozuvlari bilan urushga qarshi rasm chizgan edi. Rasmda bolani raketalardan himoya qilayotgan ayol va Ukraina bayrog‘i tasvirlangan. Darsdan keyin ertasi kuni politsiya Moskalyov va maktabdan uning qizini olib ketdi. Bo‘limda u “Odnoklassniki” ijtimoiy tarmog‘idagi akkaunti nomidan yozilgan “Rossiya armiyasi. Jinoyatchilar yonimizda” izohi tufayli unga qarshi armiyani “obro‘sizlantirish” bo‘yicha protokol tuzilganini bildi. Ushbu protokolga ko‘ra, sud Moskalyovni 32 ming rubl miqdorida jarimaga tortdi.
Aleksey Moskalyov va uning qizi Federal xavfsizlik xizmati tomonidan so‘roq qilingan. Mashani otasining ishi bo‘yicha sudning ertasiga maxsus xizmatlar olib ketgan. Masha maktabga borishni to‘xtatgan va uydan o‘qishga o‘tgan. 2022-yil 30-dekabrda ularning uyi tintuv qilingan.
Moskalyovning so‘zlariga ko‘ra, tintuv o‘tkazilgan kuni ertalab uning uyi oldida beshta politsiya mashinasi, shuningdek, Favqulodda vaziyatlar vazirligi va o‘t o‘chirish xizmati mashinalari kelib to‘xtagan. Uning aytishicha, FXX xodimlari shkafdagi narsalarni chiqarib, kiyimlarni oyoqosti qilgan, devorlardan rasmlarni yirtib tashlagan va mebellarni ag‘dargan. Ular barcha jihozlar, shuningdek, oilaning barcha jamg‘armalari — 125 ming rubl va 3 150 dollarni tortib olishgan. So‘roq paytida xavfsizlik kuchlari undan: “Dollarni qayerdan oldingiz? Xo‘jayiningiz kim? Kim uchun ishlaysiz?” degan savollarni so‘ragan.
Moskalyovning so‘zlariga ko‘ra, so‘roq paytida xavfsizlik kuchlari unga kuch ishlatgan. Shundan so‘ng u qizi bilan Uzlovaya shahriga ketishga qaror qilgan. Shahar Tula viloyatida, Moskalyovlar yashagan Yefremovdan 100 kilometr uzoqlikda joylashgan.
Aleksey Moskalyov 1-mart kuni hibsga olindi, unga qarshi “Odnoklassniki”da Bucha aholisi va asirga olingan ukrainaliklarning o‘ldirlishi haqida yozilgan izohlar tufayli armiyani qayta-qayta “obro‘sizlantirish” aybi bilan jinoiy ish ochilgan. Ishga aynan qanday izohlar sabab bo‘lganiga Tergov qo‘mitasi o‘z hisobotida aniqlik kiritmagan. 2-martdan beri Moskalyov uy qamog‘ida saqlangan.
Masha Moskalyova voyaga yetmaganlar markaziga olib ketildi. Ota qizi bilan aloqada emas. Ma’lum bo‘lishicha, yanvar oyida Yefremov shahrining Voyaga yetmaganlar ishlari bo‘yicha komissiyasi Moskalyov va qizning onasini ota-onalik huquqidan mahrum qilish bo‘yicha sudga murojaat qilgan. Komissiya rahbari Svetlana Davydovaning so‘zlariga ko‘ra, 2022-yilning may oyidan beri Moskalyovlar oilasi “ijtimoiy xavfli vaziyatdagi oilalarning profilaktik ro‘yxati”da. U qizning otasi ikki marta ma’muriy javobgarlikka tortilgani va qizini maktabga qaytarishga urinmaganini, onasi esa alohida yashagani va uning hayoti bilan qiziqmasligini ta’kidladi.
Ota-onalik huquqidan mahrum qilish bo‘yicha sud majlisi 6-aprelga belgilangan.
Sud Aleksey Moskalyovning jinoiy ishini bir kun ichida — 27-martda ko‘rib chiqdi. Prokuror ayblanuvchini ikki yilga ozodlikdan mahrum qilishni so‘radi. Sud majlisida Moskalyov jinoiy ishga sabab bo‘lgan izohlarni u yozmaganini aytdi. Uning aytishicha, “Odnoklassniki”dagi sahifasi bir necha bor xakerlik hujumiga uchragan.
Sud jarayonida Moskalyov qisqa nutq so‘zladi: “Agar siz hozir Ukrainadagi ‘maxsus operatsiya’ga qanday munosabatda ekanimni so‘rasangiz, menimcha, hatto zaldagi odamlarning 90 foizdan ko‘prog‘i ham bunga qarshi. Va men ularga qo‘shilaman. O‘limga, odamlarning o‘limiga qanday munosabatda bo‘lish mumkin? Kattalar, bolalar o‘lmoqda. Faqatgina salbiy munosabat, urushga yana qanday munosabatda bo‘lish kerak? Lekin negativ narsalarni, haqoratlarni yozish haqida gap ketayotgan bo‘lsa ... buni men qilmadim”.
Hukm chiqqan 28-mart kuni Moskalyovning advokati Vladimir Biliyenko Masha istiqomat qilayotgan boshpana xodimlari bilan gaplashishga muvaffaq bo‘ldi. Unga qizning rasmlarini berishgan, shuningdek, otasiga atalgan xatni ko‘rsatishgan. “Oxirida katta yurak chizilgan va shunday so‘zlar yozilgandi: ‘Dada, siz mening qahramonimsiz’”, — dedi advokat.
