Adliya vazirligiga huquqiy ekspertizadan o‘tkazish uchun 2022-yil davomida 2 ming 667 ta normativ-huquqiy hujjatlar loyihasi kiritilgan. Bu haqda 29-mart kuni Adliya vazirligida bo‘lib o‘tgan matbuot anjumanida maʼlum qilindi, deya xabar bermoqda “Daryo” muxbiri.
Anjumanda ekspertizadan o‘tkazish uchun kiritilgan huquqiy hujjatlarning 288 tasi qonun hujjatlari, 856 tasi prezident hujjatlari va 1 ming 523 tasi esa hukumat qarorlaridan iborat ekanligi aytib o‘tildi.
Kiritilgan 442 ta loyiha reglament talablariga rioya qilinmagani bois ishlab chiqaruvchilarga qaytarilgan. Huquqiy ekspertizadan o‘tkazilgan 2 ming 225 ta loyihadan 1 ming 546 tasiga ijobiy xulosa berilgan bo‘lsa, 679 tasi jiddiy yoki kontseptual eʼtiroz bilan qaytarilgan.
Loyiha tayyorlab, uni ekspertizaga kiritishda qo‘yilgan talablarga to‘la rioya qilishda eng yuqori natija ko‘rsatgan vazirlik va idoralarning ro‘yxati taqdim etildi. Unga ko‘ra:
- Moliya vazirligi kiritgan 138 ta loyihadan 109 tasiga ijobiy xulosa berilgan;
- Transport vazirligi kiritgan 65 ta loyihadan 48 tasiga ijobiy xulosa berilgan;
- Davlat bojxona qo‘mitasi kiritgan 52 ta loyihadan 38 tasiga ijobiy xulosa berilgan;
- Ichki ishlar vazirligi kiritgan 138 ta loyihadan 95 tasiga ijobiy xulosa berilgan;
- Iqtisodiyot vazirligi kiritgan 143 ta loyihadan 93 tasiga ijobiy xulosa berilgan.
Mos ravishda salbiy natija ko‘rsatgan vazirlik va idoralar beshligi ham eʼlon qilindi:
- Uy-joy kommunal xizmat ko‘rsatish vazirligi kiritgan 43 ta loyihadan 24 tasi qaytarilgan;
- Qishloq xo‘jaligi vazirligi kiritgan 90 ta loyihadan 45 tasi qaytarilgan;
- Investitsiyalar va tashqi savdo vazirligi kiritgan 160 ta loyihadan 78 tasi qaytarilgan;
- Turizm va madaniy meʼros vazirligi kiritgan 69 ta loyihadan 33 tasi qaytarilgan;
- Madaniyat vazirligi kiritgan 67 ta loyihadan 29 tasi qaytarilgan.
Mavzuga doir:
Izoh (0)