Jizzaxda ikki fuqaroni 6,4 ming dollar evaziga Janubiy Koreya yuborishni va’da qilgan shaxs qo‘lga olindi
Bosh prokuratura huzuridagi departament xodimlari tomonidan joylarda pul evaziga xorijiy davlatlarga yuborishni vaʼda qilgan shaxslar qo‘lga olindi.
Xususan, departament hamda DXXning Jizzax viloyati boshqarmalari tomonidan o‘tkazilgan tezkor tadbirda, muqaddam firibgarlik jinoyati uchun sudlangan M.N. fuqarolar G.A. va K.O‘.ning ishonchiga kirib, ularni go‘yoki Migratsiya xizmatida ishlovchi tanishlari yordamida Janubiy Koreya davlatiga ishga yuborish evaziga 6 400 AQSH dollarini olgan vaqtida ashyoviy dalillar bilan ushlangan.
Shu kabi, departament hamda DXXning Mirzo Ulug‘bek tumani bo‘limlari tomonidan o‘tkazilgan tezkor tadbirda, fuqarolar A.Sh. va K.N. fuqaro E.X.ning ishonchiga kirib, uni go‘yoki Migratsiya xizmatida ishlovchi tanishlari yordamida Angliya davlatiga ishga yuborishi va hujjatlarini rasmiylashtirib berishi evaziga 1 000 dollarni olgan vaqtlarida ashyoviy dalillar bilan qo‘lga olingan.
Departamentning Marg‘ilon shahar bo‘limi tomonidan o‘tkazilgan tergovga qadar tekshiruvda fuqaro M.A. fuqarolar I.A. va U.I.ning ishonchiga kirib, ularni Yaponiya yoki Janubiy Koreya davlatlariga ishga yuborish evaziga jami 4 850 dollarni firibgarlik yo‘li bilan qo‘lga kiritgani aniqlanib, ushbu pullar hisobidan 400 dollarini qaytargani protsessual tartibda rasmiylashtirilgan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
