Gollivud aktyori Bred Pitt Los-Anjelesdagi hashamatli uyini sotdi. Aktyor mulki uchun rekord darajada 39 million dollar oldi, deb xabar bermoqda “Korrespondent.net” nashri.
Ma’lum bo‘lishicha, Los Felizning go‘zal hududida, ko‘plab mashhurlar yashaydigan joyda joylashgan uyni Pitt 1994-yilda 1,7 million dollarga sotib olgan. Aktyor uyida sobiq rafiqalari Jennifer Eniston va Anjelina Joli bilan birga yashagan.
Uy 1915-yilda qurilgan bo‘lib, taxminan 1000 kvadrat metr maydonga ega. Unda to‘rtta yotoqxona, to‘rtta hammom, kamin, kutubxona, ovqatlanish xonasi, oshxona va mehmonxona mavjud. Uyning ichki qismi klassik uslubda, jumladan, ar-deko elementlaridan iborat.
Uy hududida mehmonxona, basseyn, tennis korti va konkida uchish maydoni mavjud. Pitt mustaqil ravishda landshaft dizayni bilan shug‘ullangan va bog‘ni dunyo bo‘ylab auksionlarda sotib olgan turli haykallar bilan bezatgan.
Izoh (0)