Andijonda 64 yoshli shifokor bemorning eri tomonidan kaltaklandi
Ijtimoiy tarmoqlarda Bo‘ston tumanida shifokor bemorning eri tomonidan kaltaklangani haqida xabarlar tarqaldi. Andijon viloyati Sog‘liqni saqlash boshqarmasi axborot xizmati «Daryo»ga ushbu holat yuzasidan maʼlumot berdi.
Qayd etilishicha, joriy yilning 10-mart kuni soat 05:20 lar chamasida fuqaro M.D. turmush o‘rtog‘i M.D.ni Bo‘ston tuman tibbiyot birlashmasi shoshilinch qabulxona bo‘limiga olib kelgan. Ushbu bemor navbatchi jarroh B.Q. tomonidan ko‘rilib, ichak sanchig‘i tashxisi qo‘yilgan. Bemorga analgin, Dimedrol qilinib, qabulxonada zudlik bilan UZI va boshqa tekshiruvlardan o‘tkazilgan.
Bemorning turmush o‘rtog‘i M.D. navbatchi shifokor ko‘rigidan norozi bo‘lib, uning boshiga chashka hamda yuz sohasiga musht bilan urib, tan jarohati yetkazgan.
B.Q. rentgen tekshiruvidan o‘tkazilganida burun suyagining yopiq sinishi hamda ustki sohasining yirtilishi tashxisi qo‘yilgan.
Hozirda tuman prokuraturasi tomonidan surishtiruv-tergov ishlari olib borilmoqda.
