Ayni vaqtda prezident Shavkat Mirziyoyev raisligida Qoraqalpog‘iston Respublikasi Kegeyli tumanida yig‘ilish bo‘lib o‘tmoqda. Bu haqda “Daryo” muxbiri xabar berdi.
Prezident mutasaddilarga Qoraqalpog‘istonda amalga oshirilishi kerak bo‘lgan masalalar yuzasidan qator topshiriqlar berdi. Xususan, yil yakuniga qadar Milliy bank tashabbusi asosida boshqa tumanlarga biriktirilgan banklar ham kamida uchtadan katta sanoat loyihasi amalga oshiriladi.
Prezident aholiga dehqonchilik qilishga beriladigan yerlarda chorvaga ozuqa yetishtirish uchun 5 gektargacha ajratish taklifini qo‘llab-quvvatlashini bildirdi.
2023-yilda Qoraqalpog‘istondagi meva-sabzavotchilik va chorvachilik loyihalariga 10 million dollar yo‘naltiriladi. 1-oktyabrga qadar Bo‘ston kanalini betonlash ishi yakunlanib, 100 ming gektarda suv taʼminoti yaxshilanadi. Buning hisobiga 23 ta nasos stansiyasi va 400 ta nasos agregati to‘xtatilib, kelgusi yildan yiliga 45 million kilovatt elektr iqtisod qilinadi.
Amudaryo, Bo‘zatov, Chimboy, Ellikqalʼa, Qonliko‘l, Kegeyli, Taxiatosh, Qorao‘zak, Xo‘jaylida yil yakunigacha:
- 1 tadan 100-150 o‘rinli bog‘cha davlat hisobidan qurib beriladi;
- barcha maktablar va shifoxonalarni taʼmirlashga, shu jumladan issiqlik taʼminotini qilib berishga qo‘shimcha mablag‘ ajratiladi.
1-maydan “G‘uzor – Buxoro – Nukus – Beynov” yo‘lining Ellikqalʼa, To‘rtko‘l, Beruniy hududidan o‘tgan 25 kilometri rekonstruksiya qilish ishlari boshlanadi.
Izoh (0)