Surxondaryoda mashinalardan pul va buyumlarni o‘g‘irlayotgan guruh ushlandi

Surxondaryo viloyati Termiz shahrida 25-mart kuni Matiz olib qochgan yigitlar ushlandi. Bu haqda Tergov departamenti axborot xizmati xabar berdi.

Ma’lum bo‘lishicha, noma’lum shaxs “Do‘stlik” mahallasi hududida 37 yoshli X.G‘.ga tegishli Matiz’ni noma’lum tomonga olib qochib ketgan.

Olib borilgan tergov-tezkor tadbirlari davomida mazkur avtomashina noma’lum shaxs tomonidan Termiz tumani “Jo‘yjangal” mahallasida tashlab ketilgani, jabrlanuvchiga tegishli bo‘lgan 200 ming so‘m pul va videoregistratorda joylashgan fleshkarta yo‘qligi aniqlangan.

Aniqlanishicha, mazkur jinoyatni 18 yoshli J.B. o‘ziga oldindan tanish bo‘lgan mahalladoshi, voyaga yetmagan 15 yoshli M.I. bilan bir guruhga birlashib, jinoiy reja tuzib, sodir qilgani aniqlangan. Ulardan avtomashina videoregistratoridan olingan fleshkarta ashyoviy dalil tariqasida rasmiylashtirib olingan.

Mazkur holat yuzasidan Termiz shahar ichki ishlar bo‘limi huzuridagi tergov bo‘limi tomonidan J.B. va voyaga yetmagan M.I.ga nisbatan Jinoyat kodeksining 267-moddasi 2-qismining “b”,“g” bandlari (transport vositasini olib qochish) bilan jinoyat ishi qo‘zg‘atilib, gumon qilinuvchilar protsessual tartibda ushlangan.

Tergov davomida ular boshqa avtomashinalar qulfini ham buzib kelgani, mashinada bo‘lgan qimmatbaho narsalar va pullarini o‘g‘irlagani, mazkur avtomashinani esa o‘zlari aylanish uchun olib qochishganini bayon qilishgan. Hozirda ushbu shaxslarning boshqa jinoyatlarga aloqadorligi tekshirilmoqda.