Poyabzal hidlanadigan bo‘lib qolsa, qanday yo‘l tutish kerak?

Oyoq kiyimdan yoqimsiz hid kelishi yangi muammo emas va juda keng tarqalgan. Bu holat faqat erkaklarga xos deb o‘ylasangiz, adashasiz. Noxush hid ko‘plab komplekslarning sababi bo‘lib, albatta, noqulaylik tug‘diradi. Mehmonda, ziyofatda oyoq kiyimni yechishga to‘g‘ri kelganda xijolat bo‘lmaslik uchun undan qanday qutulish kerakligini quyida bilib oling.

Bu hid qayerdan keladi?

Dastavval, shuni qayd etish kerakki, o‘zingizga munosib poyabzal sotib olgan bo‘lishingiz lozim. Oyoq kiyim yuqori sifatli, havo o‘tkazadigan materiallardan tayyorlangan bo‘lishi zarur. Shunda kun bo‘yi etik yoki krossovkada yurishingiz kerak bo‘lsa ham, oyoqlaringiz terlamaydi. Ammo yoqimsiz hidning asosiy sababi faqatgina poyabzalda emas, balki nam muhitda ko‘payishni yaxshi ko‘radigan bakteriyalarda.

Nam muhit ko‘p hollarda ter va gohida ho‘l poyabzalda (ko‘lmakka bexosdan oyoq bosganda) hosil bo‘ladi. Poyabzal ho‘l bo‘lishi bilan bakteriyalar faol ravishda ko‘paya boshlaydi va hidli yog‘ kislotalarini ishlab chiqaradi.

Bundan tashqari, badbo‘y hidning eng keng tarqalgan sabablaridan biri zamburug‘ infeksiyasi — mikozdir. Ushbu variantni istisno qilish uchun poyabzalni almashtirish bilan ish bitmaydi, balki shifokorga uchrab, malakali davolanishni boshlashingiz kerak. Chunki hid bilan kurashishning barcha uy sharoitidagi usullari ikkinchi darajalidir. Oyoq kiyimga dezodorant yoki xohlagancha upa (talk) sepishingiz mumkin, muammo saqlanib qolaveradi va sizni bezovta qiladi.

2 ta muhim maslahat

Dush qabul qilgandan so‘ng sochiq bilan faqat oyoqlarnigina emas namlik bakteriyalarning ko‘payishiga olib kelmasligi uchun barmoqlaringiz orasidagi namni quriguncha yaxshilab arting. Va, albatta, muntazam ravishda paypoqlarni o‘zgartirib turing. Sintetik paypoqni kamroq kiyishga harakat qiling — unda oyoqlar ko‘proq terlaydi.

Bir necha kun ketma-ket bitta poyabzalni kiymang. Kechasi u to‘liq qurishga ulgurmaydi.

Qanday qilib hiddan xalos bo‘lish mumkin?

Poyabzal spreylari

Noxush hidni yo‘qotish uchun ko‘plab tayyor mahsulotlar mavjud. Spreylar shaklida ishlab chiqarilganini tanlagan ma’qul. Maxsus krem ​​bilan artib olish unchalik qulay emas, chunki u ba’zan paypoqda oq dog‘lar hosil qiladi.

Maxsus vositalar va koptokchalar

Kechki payt ortiqcha namlikni o‘zlashtiradigan va yoqimsiz hidlarni yo‘qotadigan koptokchalar yoki maxsus vositalarni solib qo‘ying. Ular ko‘pincha sport poyabzallari do‘konlarida sotiladi, ular hidni juda yaxshi tortib oladi va uzoq vaqt davomida ishlatilishi mumkin.

Poyabzal to‘pchalari uy sharoitida davolanish bilan almashtirilishi mumkin. Shu maqsadda choy paketlari yoki iste’mol sodasi solingan mato qopchasi mos keladi.

Peroksid va ammiak

Ommabop xalqona usul: ammiak va vodorod periksni aralashtiring, eritmani purkagichli idishga quying va poyabzalning ichki qismiga seping.

Sirka kislotasining yordami

Sirka hidlanadigan oyoq kiyimdagi muammodan xalos bo‘lishga yordam beradi, lekin oddiy emas, 40 foizli sirka ishlatiladi. Paxtali tamponni namlang va bir necha kun davomida poyabzalga qo‘ying. Sirka charm poyabzallarga zarar yetkazmaydi, lekin kauchuk yuzalarga qo‘ymagan ma’qul. Jarayondan so‘ng, poyabzal yaxshilab ventilyatsiya qilinishi kerak. O‘tkir sirka hidi bir necha kundan keyin yo‘qoladi.

Antibakterial vositalar

Xlorgeksidin yoqimsiz hiddan qutulishning yana bir yo‘li. Bu ham oyoq kiyimning ichki qismiga sepish uchun maxsus vositadir.

Elektr quritgichlar

Ular etiklar, baland qo‘njli botinkalarga mo‘ljallangan ko‘p funksiyali va oyoqlari terlaganlar uchun maxsus uskunadir. Quritgich poyabzal ichiga havo purkaydi, shuning uchun poyabzalga zarar yetkazish xavfi yo‘q. Ba’zida quritish jarayoni taxminan bir soat davom etadi, bu qulay chunki uy sharoitida poyabzalni tezgina quritishning iloji yo‘q. Ammo standart sikl 3-4 soat davom etadi. Quritgichlar turli o‘lchamlarda ishlab chiqariladi. Ayollar va bolalar poyabzaliga osongina sig‘adigan kichikroq quritgichni tanlagan afzal.

Mavzuga doir:

• Haddan tashqari ko‘p terlaydiganlarga yordam beruvchi eng yaxshi layfxaklar
• Poyabzallarni qanday tozalash kerak: 8 ta sinalgan usul
• Poyabzallarni yangidek saqlash va oyoqlarga ziyon yetkazmasligi uchun 14 ta noodatiy layfxak