Davlat xavfsizlik xizmatining Farg‘ona viloyati bo‘yicha boshqarmasi, “Hududgaz Farg‘ona” gaz taʼminoti filiali va “O‘zbekneftgazinspeksiya” Farg‘ona viloyat bo‘limi xodimlari tomonidan o‘tkazilgan tadbirda Quvasoy shahrining O‘rmiyon qishlog‘ida tabiiy gazdan noqonuniy foydalanish holati aniqlandi.
Jumladan, mahalliy xususiy korxona tomonidan hech qanday hujjatlarsiz, yashirin ravishda tabiiy gazga ulanib, 3 ta xumdonda 72 ta yasama gaz yondirgichlar orqali ohak ishlab chiqarilgan.
Mutaxassislarning dastlabki hisob-kitoblariga ko‘ra, o‘tgan yilning iyun oyidan joriy yilning mart oyiga qadar 18 mln 314 ming metr kub tabiiy gazdan qonunga xilof ravishda foydalanish natijasida davlat manfaatlariga 18 milliard 314 million so‘mlik zarar keltirilgan.
Holat yuzasidan DXX Farg‘ona viloyati bo‘yicha boshqarmasi tomonidan jinoyat ishi qo‘zg‘atilgan.
Avvalroq O‘zbekistonning uch hududida elektr va gazdan noqonuniy foydalanganlar 930 mln so‘mdan ziyod zarar yetkazgani, Buxoroda uchta metan zapravka salkam 12 mlrd so‘mlik gazdan noqonuniy foydalangani to‘g‘risida xabar berilgandi.
Izoh (0)