AQSH Ukrainadagi urush jinoyatlari bo‘yicha xalqaro tribunal yaratishni qo‘llab-quvvatladi

AQSH Rossiyaning Ukrainadagi urush jinoyatlari bo‘yicha qo‘shma xalqaro tribunal yaratish tarafdori, deb ma’lum qildi Davlat departamenti matbuot kotibi o‘rinbosari Vedant Patel.

“Qo‘shma Shtatlar Ukrainaga qarshi bosqinchilik jinoyati bo‘yicha Ukraina sud tizimiga asoslangan va xalqaro sud shaklida maxsus tribunal tashkil etilishini qo‘llab-quvvatlaydi”, — dedi u.

Patelning so‘zlariga ko‘ra, AQSH tribunal keng xalqaro yordam olishi, ayniqsa yevropaliklar tomonidan qo‘llab-quvvatlanishi va “ideal holda” Yevropa davlatlaridan birida o‘tkazilishi kerak, deb hisoblaydi.

Noyabr oyi oxirida Yevrokomissiya rahbari Ursula fon der Lyayen BMT ko‘magida Rossiyaning Ukrainadagi harakatlarini tergov qilish va jinoiy javobgarlikka tortish uchun ixtisoslashtirilgan sud yaratish zarurligini ma’lum qilgandi.  Uning aytishicha, Rossiya Ukrainaga yetkazilgan moliyaviy zararni ham qoplashi kerak.

O‘sha kuni Fransiya Tashqi ishlar vazirligi Bryussel va Kiyev bilan birgalikda Rossiyaning Ukrainaga qarshi bosqinchilik jinoyati bo‘yicha Maxsus tribunal yaratish ustida ish boshlanganini e’lon qildi.

Keyinroq Niderlandiya Rossiyaning Ukrainadagi harakatlari bo‘yicha tribunalni o‘z hududida o‘tkazishga tayyorligini ma’lum qildi.

Kreml maxsus tribunal tuzish taklifini qoralab, bunday jarayon noqonuniyligini ta’kidladi.