Qashqadaryoda 50 gektar yerni 100 ming dollarga sotayotgan shaxs ushlandi

Qashqadaryo viloyati Koson tumanida 50 gektar yerni 100 ming dollarga sotayotgan shaxs ushlandi. Bu haqda Bosh prokuratura axborot xizmati xabar berdi. 

Xabarga ko‘ra, fuqaro A.B. Qashqadaryo viloyati IIB JQB Yer resurslari talon-toroj qilinishiga qarshi kurashish bo‘linmasiga qilgan murojaatiga asosan, viloyat prokuraturasi va huquqni muhofaza qiluvchi organ xodimlari bilan hamkorlikda tezkor tadbir o‘tkazildi.

Tadbir jarayonida fuqaro M.M. Koson tumani Gulbog‘ mahallasi hududidan tuman hokimining qarori bilan “G‘.A” fermer xo‘jaligiga 49 yil muddatga ijara huquqi asosida ajratilgan 50 gektar yer maydonini 100 ming dollarga sotishga kelishib, kelishilgan puldan 590 million so‘mini ariza muallifidan firibgarlik yo‘li bilan olayotgan vaqtida ashyoviy dalillar bilan ushlangan.

Mazkur holat yuzasidan departamentning Koson tumani bo‘limi tomonidan M.M.ga nisbatan Jinoyat kodeksining 168-moddasi 4-qismi “a” bandi bilan jinoyat ishi qo‘zg‘atilib, dastlabki tergov harakatlari olib borishga kirishilgan.