O‘zbekistonda mart boshidan buyon 10 tonnaga yaqin sifatsiz oziq-ovqat mahsuloti iste’moldan chiqarildi
O‘zbekistonda 1-martdan boshlab o‘tkazilayotgan “Favqulodda vaziyatlardan muhofaza qilish va fuqaro muhofazasi oyligi” davomida 10 ming kilogrammga yaqin sifatsiz oziq-ovqat mahsuloti iste’moldan chiqarildi. Bu haqda 28-mart kuni o‘tkazilgan brifingda FVV boshqarma boshlig‘i Zuhriddin Qahramonov ma’lum qildi.
Ushbu oylikdan ko‘zlangan maqsad bahor mavsumida yuzaga kelishi mumkin bo‘lgan favqulodda vaziyatlar, xususan, sel, toshqin va ko‘chki hodisalari, ovqatdan zaharlanish hamda Qrim-Kongo gemorragik isitma kasalligi bilan bog‘liq favqulodda vaziyatlarning oldini olishga qaratilgan tadbirlarni keng qamrovda amalga oshirishdir.
Zuhriddin Qahramonovning qayd etishicha, respublika bo‘yicha 2100 dan ortiq iqtisodiy va 23 574 ta ijtimoiy obyektlar, shuningdek, sel, toshqin va ko‘chkiga xavfli 144 ta obyektlar o‘rganib chiqilib, aniqlangan kamchiliklarni bartaraf etish choralari ko‘rildi. 69 ta daryo va kanallar o‘zanlari tozalanib, 6 ta daryolar qirg‘oqlarini mustahkamlash ishlari bajarildi.
“O‘zgidromet” xizmati agentligi, Xavfli jarayonlarni kuzatish davlat xizmati bilan birgalikda sel, toshqin va ko‘chkiga xavfli hududlardagi xo‘jaliklarni o‘rganib chiqib, xavfli hududlardagi 2 ta xo‘jalik doimiy va 13 ta xo‘jalik vaqtinchalik ko‘chirildi. Sel yo‘llarini tozalash, qirg‘oqni mustahkamlash kabi muhandislik-muhofaza ishlari bajarildi.
Texnogen xususiyatli favqulodda vaziyatlarning oldini olish tadbirlari davomida respublikadagi suv va sel-suv omborlari hamda boshqa gidrotexnik inshootlar o‘rganib chiqilib, ularning texnik mustahkamlik holatini yaxshilash va mavsumga shayligini ta’minlash choralari ko‘rildi.
Bundan tashqari, aholining sifatsiz oziq-ovqat maxsulotlaridan zaharlanishining oldini olish maqsadida Hududiy Sanitariya-epidemiologik osoyishtalik va jamoat salomatligi boshqarmalari bilan birgalikda jami 17 mingdan ortiq bozorlar, savdo majmualari va boshqa obyektlarda o‘rganishlar olib borildi.
Qrim-Kongo gemorragik isitmasi kasalligining oldini olish bo‘yicha Sanitariya-epidemiologik osoyishtalik va jamoat salomatligi boshqarmalari, veterinariya xizmati bilan birgalikda 16 760 ta obyektlar o‘rganilib, 900 ming metr kvadratdan ortiq maydon dezinseksiya qilish orqali zararsizlantirildi.
Yuqoridagilardan tashqari, 6 266 ta ta’lim muassalari, shifoxonalar , ishlab chiqarish va boshqa ijtimoiy –iqtisodiy obyektlarda o‘tkazilgan “Fuqaro muhofazasi kuni” tadbirlarida ishtirokchilarning favqulodda vaziyatlarda, xususan, zilzilalarda to‘g‘ri harakat qilish bo‘yicha bilim va ko‘nikmalari oshirildi.
