“Mendan ham ‘Tashabbusli budjet’ loyihasidagi boshqa mahallaga ovoz berishimni so‘rashdi, men rad qildim” — adliya vaziri Akbar Toshqulov
Adliya vaziri Akbar Toshqulov 28-mart kuni bo‘lib o‘tgan matbuot anjumanida “Open budget” portali orqali amalga oshirilayotgan “Tashabbusli budjet” loyihasi haqida o‘z fikrlarini bildirib o‘tdi, deya xabar bermoqda “Daryo” muxbiri.
Tarmoqlarda “Tashabbusli budjet” loyihasida g‘olib bo‘lish maqsadida ovoz berish uchun fuqarolarga turli qimmatliklardagi pul yoki oziq-ovqat mahsulotlari berilayotgani keng muhokamalarga sabab bo‘lmoqda. Shuningdek, joylarda maktab o‘qituvchilari ham loyiha uchun ovoz yig‘ishga jalb qilinayotgani haqida xabarlar tarqalmoqda.
Akbar Toshqulovning aytishicha, “Tashabbusli budjet” loyihasi ijobiy g‘oya sifatida joriy etilgan.
“Open budget” portalining eng katta yutug‘i nima? Eng katta yutug‘i bu — xalq pulni qayerga sarflashni o‘zi hal qilyapti. Pul orqali ovoz yig‘ilishi aslida noqonuniy yo‘l. Buning qonuniy yo‘li elektron tizim orqali ovoz berish kerak, bo‘ldi. “Open budget” portaliga yuridik jihatdan baho beradigan bo‘lsam, bu xalq pulini sarflashni hal qilishdagi O‘zbekiston uchun yangi g‘oya. Birinchi o‘rinda davlat organi yemas, yaʼni shundoq kelib buni qilish kerak, deb davlat organi belgilasin demayapti, xalq belgilasin deyapti”, — dedi adliya vaziri.
Uning alohida taʼkidlashicha, mazkur loyihada muammolar kuzatilayotgan bo‘lsa, uning yechimini ko‘rsatadigan mexanizm ishlab chiqilishi zarur.
“Lekin muammolar bor, muammoni yechish kerak. Muammo qanday yechiladi? Qanaqadir suiiste’mol qilish holatlari bo‘layotgan bo‘lsa, uning oldini oladigan mexanizm bo‘ladi. Balki, mana identifikatsiya qilishdir? Lekin buni qilmaymiz deyishdi. Ammo baribir u ham kerakdir, balki. Kecha, yakshanba kuni aylanib yurganimda menga ham ovoz berishni taklif qilishdi. “Yo‘q, men bu mahallada sayr qilib yuribman. Mahallam boshqa, o‘zimning mahallamga ovoz beraman”, deya javob berdim”, — dedi Akbar Toshqulov.
Mavzuga doir:
- “Tashabbusli budjet” loyihasida Face ID yordamida identifikatsiya qilish mexanizmi joriy etilmaydi
- “Tashabbusli budjet”da botlar orqali ovoz yig‘ish mumkinmi? Mutaxassis javob berdi
