AQSH Senati Iroqda jang olib borish uchun 1991 va 2002-yillarda qabul qilingan ruxsatnomalarni bekor qilish to‘g‘risidagi qonun loyihasini ma’qulladi. Bu haqda Reuters xabar bermoqda.
Hujjat uchun 65 kishi ovoz berdi, 28 qonunchi (barchasi respublikachilar) unga qarshi chiqdi. “Ushbu ruxsatnomalarni bekor qilish mintaqa (Iroq) va butun dunyoga Qo‘shma Shtatlar ishg‘olchi kuch emasligini, Iroqdagi urush tugaganini, biz Iroq bilan strategik sherik sifatida ishlayotganimizni ko‘rsatadi, ” — deydi demokrat senator, xalqaro aloqalar qo‘mitasi raisi Bob Menendes.
Kongress a’zolari ko‘p yillar davomida qonunchilar prezidentlarga harbiy xizmatchilarni urushga jo‘natish bo‘yicha haddan tashqari ko‘p vakolat berayotgani haqida bahslashib keladi. Yangi qonun loyihasi prezidentning harbiy vakolatlarini cheklash va konstitutsiyada ko‘rsatilgan holatlarda harbiy harakatlar boshlashni ma’qullash bo‘yicha Kongressning mutlaq huquqini tasdiqlashga mo‘ljallangan.
AQSHning Iroqdagi harbiy missiyasi yoki Iroq urushi 2003-yilda boshlangan. Vashington qo‘shin kiritilishini Saddam Husayn hukumati ommaviy qirg‘in qurollarini ishlab chiqarmoqda, degan taxmin bilan oqlagan va harbiylarni rejimni ag‘darishga chaqirgan. Mamlakatda eng ko‘p harbiy xizmatchilar 2008-yilda joylashtirilgan — prezident kichik Jorj Bush qaroriga binoan u yerga deyarli 158 ming kishi yuborilgan.
2011-yilda operatsiya tugagan deb e’lon qilindi va AQSHning keyingi prezidenti Barak Obama ko‘rsatmasi bo‘yicha amerikalik harbiylarning aksariyati mamlakatni tark etdi.
Izoh (0)