Prezident administratsiyasi mas’ullari ishtirokida 28-mart kuni o‘tkazilgan maxsus brifingda yaqin kunlarda davlat rahbari tomonidan imzolangan farmon va qonunlar yuzasidan ma’lumotlar berildi. Bu haqda “Daryo” muxbiri xabar berdi.
Iqtisodiy tadqiqotlar va islohotlar markazi direktori Obid Hakimovning ma’lum qilishicha, birinchi o‘rinda, bu mahsulotlar aholi iste’molida eng ko‘p qo‘llanadi. Birgina 2022-yilda mana shu mahsulotlar respublikaga 900 million dollarga yaqin import qilingan va ular uchun 500 milliard so‘mdan ortiq bojxona boji to‘langan.
“Umuman olganda, bojxona bojini nollashtirish ikkita yo‘nalish bo‘yicha o‘z ta’sirini ko‘rsatadi. Birinchi yo‘nalish, har doim boj narxi tushganda mahsulot arzonlashadi, buning evaziga iste’mol ko‘payadi. Bu savdoni hosil qilish effekti deb ataladi. Ikkinchisi esa mamlakatlararo savdo paytida yo‘nalish o‘zgaradi.
Ikkita yo‘nalish bo‘yicha iste’molchilarga qanday ta’sir ko‘rsatiladi? Uy xo‘jaliklarini oladigan bo‘lsak, bu mahsulotlar asosan kam va o‘rta daromadli uy xo‘jaliklarining daromadi katta qismi sarflanayotgan oziq-ovqatlar hisoblanadi. Nollashtirish natijasida go‘sht importining 4,8 million dollarga, pishloq 900 ming dollar, yong‘oq va unga o‘xshagan mahsulotlar 1,3 million dollar, olma va noklar 2 million dollarga yaqin, boshqa sabzavotlar 1,6 million dollar, kolbasa mahsulotlari importi 2,5 million dollarga oshadi.
Bu esa aholining iste’mol ko‘rsatkichi oshishiga olib keladi. Iste’mol oshishi natijasida aholining farovonligi darajasi 0,45 foizga oshishi kutilyapti. O‘z navbatida, bu choralar oziq-ovqat mahsulotlari narxlari oshishini ham nazoratda ushlab turadi. Umuman olganda, 32 turdagi mahsulotlarning import narxlari 1 foizdan ortiqroq pastga tushishi ko‘zda tutilmoqda”, — deydi Obid Hakimov.
Izoh (0)