Yil boshidan O‘zbekiston birjasida 135 mln dollarlik tashqi savdo bitimlari tuzildi
Joriy yilning boshidan buyon O‘zbekiston respublika tovar-xomashyo birjasida 134,4 mln dollarlik tashqi savdo bitimlari tuzildi. Bu haqda birja matbuot xizmati xabar bermoqda.
Mazkur ko‘rsatkich o‘tgan yilning mos davri bilan solishtirganda 13 foizga ko‘pdir.
Shu jumladan, birja orqali xarid qilingan mahsulotlarning katta qismi, yaʼni 77 foizini oziq-ovqat mahsulotlari va mineral o‘g‘itlar egalladi.
Birja savdolari orqali eksport qilingan mahsulotlar qatoridan rangli metallar, neft mahsulotlari va qurilish mollari o‘rin oldi.
Ko‘rib chiqilayotgan davrda Belarus va Qozog‘istonda 2 ta birjaning yangi xorijiy savdo maydonchalari va 4 ta xorijiy brokerlik idoralari ochildi. Shuningdek, qariyb 500 ta yangi norezident mijozlar akkreditatsiyadan o‘tkazildi.
O‘tgan davrda hamkorlik aloqalarini muhokama qilish maqsadida Istanbul energiya birjasi (EXIST) va Pokiston tovar birjasi (PMEX)ning vakillari bilan onlayn uchrashuvlar o‘tkazildi.
Malayziya birjasi (Bursa Malaysia) mutaxassislari O‘zbekiston respublika tovar-xomashyo birjasining mutaxassislari va brokerlari uchun tovar derivativalariga bag‘ishlangan o‘quv seminarlarini o‘tkazishdi.
Shuningdek, AQSH Savdo vazirligining Tijorat huquqini rivojlantirish dasturi (CLDP) va Tovar birjalari bo‘yicha komissiyasi (CFTC) bilan zamonaviy birja savdo vositalarini joriy etish bo‘yicha maslahatlashuvlar ham davom ettirilmoqda.
