Turkmaniston hukumati zilzila va boshqa ofatlar yuz berganda mahalliy aholini evakuatsiya qilish uchun mamlakatning har bir hududida lagerlar tashkil etmoqchi. Bu haqda “Xronika Turkmenistana” xabar berdi.
Vaqtinchalik turar joy zonalarining yaratilishiga so‘nggi paytlarda Markaziy Osiyo mamlakatlarida, jumladan Turkmanistonda kuzatilgan bir necha zilzilalar sabab bo‘lgan. Turkmanistonlik seysmologlarning ma’lumotiga ko‘ra, yaqinda mamlakatda sodir bo‘lgan yer silkinishlari kuchi 4,8 ballga yetgan. Qurbonlar va vayronagarchiliklar bo‘lmaganiga qaramay, uch kun davomida Turkmanistonning barcha huquq-tartibot idoralari kuchaytirilgan rejimda ishlagan.
Ta’kidlanishicha, 8-10 kilometr uzoqlikdagi har bir viloyatda 20 gektar maydonda tabiiy yoki texnogen oqibatlar sodir bo‘lgan taqdirda aholining vaqtincha yashashi uchun hududlar tashkil etish bo‘yicha hukumat qarori qabul qilingan. U yerda chodirlar va suv rezervuarlari o‘rnatiladi. Viloyatlarda joylashgan harbiy qismlar ushbu hududlarni chodirlar, ko‘rpa-to‘shak va matraslar bilan ta’minlashi kerak.
Omborlarda 15 kunga yetarli oziq-ovqat mahsulotlari saqlanadi. Bundan tashqari dori-darmon, bint, gigiyena vositalari va zarur tovarlar zaxirasi yaratiladi. Ichki ishlar organlari zilzila payti talonchilikni oldini olish uchun banklar, davlatga qarashli do‘konlar, oziq-ovqat omborlari hamda zavod va fabrikalar omborlarida signalizatsiya vositalarining ishlashini tekshiradi.
Izoh (0)