“Yangi mashinam kalitini doktorning oldiga qo‘yib, onamni saqlab qolishini so‘raganman”. Toshpo‘lat Matkarimov onasining o‘limi unga qanday ta’sir qilgani haqida (video)

O‘zbekistonda xizmat ko‘rsatgan artist Toshpo‘lat Matkarimov “Sevimli” telekanalining “Mashhurlar” ko‘rsatuviga bergan intervyusida onasi vafot etganidan so‘ng bir muddat o‘ziga kela olmagani, eng mashhur davrlarini hozirda sog‘inmasligi haqida gapirib berdi.

“Yangi mashinamning kalitini doktorning oldiga qo‘yib, onamning hayotini saqlab qolishini so‘raganman”

— Endi ijodimni yaxshilab boshlab olganimda, 1991-yilning 18-aprel sanasida onam vafot etdi. Sochlarim o‘sgan, olovdek yurgan paytlarim edi, o‘sha kuni sochimni oldirib tashlaganman. Bir kun oldin ko‘rgan inson meni tanimasdi, onamning vafot etgani shu darajada ta’sir qilgan. Vrachning oldiga borib, yangi mashinamning kalitini, hamma narsani qo‘yganman, nima bo‘lsa hammasi sizga, faqat onamning hayotini saqlab qoling, deb so‘raganman. Keyin u “Men Xudo emasman, bu menga bog‘liq narsa emas”, — deb aytdi. Operatsiya yaxshi o‘tdi, lekin uning asorati yomon ekan. Sochimni oldirganimdan keyin 40 kun uydan chiqmaganman.

“Musiqa ovozidan charchab, to‘ylarda qulog‘imga paxta tiqib, qo‘shiq aytadigan bo‘ldim”

— Mashhur bo‘lgan davrlarim men uchun azobga aylangan. Nihoyatda qiyin bo‘lgan, to‘xtovsiz jonli ijrolar, safarlar, buni Allohning bergan rohatimi yoki azobimi, deb o‘ylab qolardik. Birorta radioning ham ovozini eshita olmaydigan darajaga bordim. Musiqa ovozidan charchab, to‘ylarda qulog‘imga paxta tiqib, qo‘shiq aytadigan bo‘ldim. Bu narsalar men uchun juda katta qiyinchiliklarga aylandi, lekin shuni ham kamaytirib, barchasidan o‘tib oldim.