Rossiyada avval kichik huquqbuzarliklar uchun mamlakatdan chiqarib yuborilgan mehnat muhojirlariga nisbatan amnistiya e’lon qilish taklif etildi. Bu haqda “Rossiyskaya gazeta” xabar berdi.
Bu tashabbusni Davlat dumasining iqtisodiy siyosat qo‘mitasi raisi o‘rinbosari Artem Kiryanov ilgari surdi. U bu chora Rossiya mehnat bozoriga 200 minggacha xorijlik ishchilarni jalb qilishga yordam berishini aytdi va Rossiya qurilish majmuasida migrantlarga talab yuqori ekanini qayd etdi.
Hozirda kichik huquqbuzarlik sodir etgan fuqarolarga nisbatan amnistiyani kengaytirish taklif qilinmoqda. Asosan, bu hujjatlarni o‘z vaqtida rasmiylashtirmagan yoki mamlakatni tark etishni kechiktirgan migrantlarga tegishli. Deputat hali deportatsiya qilinmagan xorijliklardan ham jazoni olib tashlash mumkinligini aytdi. Hozir bu tashabbus hamjamiyat tomonidan muhokama qilinmoqda.
Avvalroq, Rossiyadan deportatsiya qilingan xorijlik quruvchilar uchun amnistiya zarurligini NOSTROY prezidenti Anton Glushkov ham aytgandi.
“Menimcha, Rossiyadan deportatsiya qilingan xorijiy ishchi kuchi masalalarida amnistiya mexanizmni ishlab chiqish vaqti keldi. Chunki xorijiy kuchlar kerak, ular Rossiya hududida ishlash tajribasiga ega”, — degan edi u.
Glushkov migratsiya qonunchiligini buzgani uchun deportatsiya qilingan migrantlar soni anchagina ekanini qayd etgan. Mehnat muhojirlari uchun amnistiya Rossiya amaliyotida juda keng tarqalgan mexanizm bo‘lib, bir necha marta qo‘llanilgan. 2017-yilning bahorida Rossiya 100 mingga yaqin Tojikiston fuqarosiga nisbatan birinchi amnistiyani amalga oshirgan. Turli yillarda Moldova, Qirg‘iziston va O‘zbekiston fuqarolari ham amnistiyaga tushgan.
Izoh (0)