Belarusdagi rus harbiylari soni kamaydi: Ukraina chegarachilari sababini tushuntirdi
Ukraina Davlat chegara xizmati spikeri Andrey Demchenko Belarusdagi rus harbiylari soni kamayganini ma’lum qildi. Bu haqda ''ZN.ua'' xabar berdi.
Keltirilishicha, hozir Belarus hududida 4 000 ga yaqin rossiyalik harbiy xizmatchilar bor. Chegaradagi vaziyat Ukraina nazorati ostida qolmoqda, biroq Belarus Rossiya bo‘linmalari uchun quruqlik va havo hududini berishda davom etmoqda.
“Hozir Rossiya Qurolli kuchlarining 4 000 dan ortiq harbiy xizmatchisi Belarus hududida, ular asosan qo‘shma mashg‘ulotlarda qatnashmoqda. Bu raqam avvalgidan biroz kamroq”, — dedi u.
Demchenko kamayishni Rossiyaning Belarusdan tayyorlangan harbiy bo‘linmalarini olib chiqib ketgani bilan izohladi. Ular Rossiyadan Ukraina sharqiga joylashtirilayotgani qayd etilgan.
25-mart kuni Rossiya prezidenti Putin Belarus hududida taktik yadro qurollari joylashtirilishini ma’lum qilgandi. Belarus rahbari Aleksandr Lukashenko agar Ukraina Buyuk Britaniyadan uranga boyitilgan snaryadlarni qabul qilsa, “dahshatli javob” bo‘lishi bilan tahdid qilgan. Ukraina Qurolli kuchlari bosh shtabi Rossiya armiyasining Belarusdan hujum qilish xavfi bir yil davom etishini bildirgan.
