“100 ga yaqinidan 73 tasi yangilandi”. Dehqonoboddagi jin ko‘priklarning nechtasi yangilanganiga aniqlik kiritildi (video)
Qashqadaryo viloyatining Dehqonobod tumani tog‘li hudud hisoblangani bois, tumandagi qishloqlarga bahor mavsumida tez-tez sel keladi. Mavsumiy sellar esa qishloq hududlaridagi xalq tilida jin ko‘prik nomini olgan qo‘lbola ko‘priklarni yuvib, yaroqsiz holga keltirib qo‘yadi. Bu nafaqat aholiga, masʼullarga ham noqulaylik tug‘diradi. Sababi sel suvi yuvib ketgan ko‘prikni taʼmirlash yana mahalliy hokimlik gardaniga tushadi. Hokimlik esa ilgari taʼmirlagan ko‘prigini yana taʼmirlashga, unga takroriy mablag‘ sarflashga majbur bo‘ladi.
Prezident Shavkat Mirziyoyev Qashqadaryo viloyatiga tashriflarining birida unga murojaat qilayotgan qashqadaryoliklarning aksariyati “ko‘prik qurib bering, prezident buva” deb yozishini aytib, viloyatdagi dolzarb muammolardan biri ko‘prik qurilishi bilan bog‘liq masala ekanini maʼlum qilgandi. O‘shanda davlat rahbari “Qishloqda yashayotgan odamlar rozimi? Menga kelgan xatlarning ko‘pida ‘ko‘prik qurib bering, prezident buva‘ deb yozishgan”, — degandi.
Dehqonobod tumani hokimi Zoir Aliqulovning “Daryo”ga maʼlumot berishicha, davlat rahbarining bu masalaga eʼtibori birgina Dehqonobodda to‘rt oyda 9 ta yangi ko‘prik qurilishiga sabab bo‘lgan.
Masʼullarning maʼlumot berishicha, Dehqonoboddagi mavjud qishloqlarda 100 ga yaqin shunday qo‘lbola ko‘priklar bo‘lgan. Ayni kunga qadar esa ularning 73 tasi qayta qurilib, aholining foydalanishi uchun topshirilgan.
“Prezidentimiz topshiriqlari bilan oxirgi besh-olti yilda 73 ta yangi ko‘prik qurdik. Shundan 9 tasi so‘nggi to‘rt oy davomida qurilib, Navro‘z bayrami arafasida foydalanishga topshirildi. Yana 5 ta ko‘prik barpo qilinishi rejalashtirilgan. Bu ko‘priklar tumanimizning ‘Beliboyli‘, ‘Boshchorbog‘, ‘Boyqo‘rg‘on‘, ‘Chilgaz‘ hamda ‘Torqopchug‘ay‘ mahallalarida qad rostlaydi”, — dedi Dehqonobod tumani hokimi Zoir Aliqulov.
