Toshkent viloyatida kuchli ta’sir qiluvchi dorilarni ozdiruvchi dori deb sotayotgan qozog‘istonlik fuqaro qo‘lga olindi

Toshkent viloyatida “ozdiruvchi dori” sifatida sotilayotgan 100 ming dona kuchli taʼsir qiluvchi vositalarning muomalasiga chek qo‘yildi, deb xabar bermoqda viloyat IIBB matbuot xizmati.

Ma’lum qilinishicha, Toshkent viloyati IIBB Giyohvandlik va psixotrop moddalarning noqonuniy muomalasiga qarshi kurashish bo‘limi, hamkor tashkilotlar tomonidan viloyatning Zangiota tumanida navbatdagi nazorat-reyd tezkor tadbiri o‘tkazilgan.

Tadbirda 1989-yilda tug‘ilgan ayol G.D.ning yashash xonadoni xolislar ishtirokida ko‘zdan kechirilganda uy ichi va hovlidagi mashinada qora bozordagi narxi 200 million so‘mga teng 15 xil nom va ko‘rinishdagi 36 ming 696 dona kuchli taʼsir qiluvchi dori vositalari sotish maqsadida saqlab kelinayotgani aniqlangan.

Shundan so'ng tezkor tadbir davom ettirilib, bu ayolga dori vositalarini yetkazib berayotgan taʼminotchi ham O‘zbekiston hududiga “tovar” bilan kirgan vaqtida IIBB xodimlari tomonidan qo‘lga olingan.

Aniqlanishicha, Qozog‘iston fuqarosi bo‘lgan E.O‘. (1989-yilda tug‘ilgan) 2 ming quti yoki 72 ming dona tarkibida kuchli taʼsir qiluvchi modda bo‘lgan (O‘zbekistonda savdosi tartibga solingan) dorilarni yashirin ravishda davlat chegarasidan olib o‘tgan.

Hozirda mazkur holat yuzasidan Jinoyat kodeksining 251-moddasi (kuchli taʼsir qiluvchi yoki zaharli moddalarni qonunga xilof ravishda muomalaga kiritish) 3-qismi bilan jinoyat ishi qo‘zg‘atilib, tergov harakatlari o‘tkazilmoqda.