Toshkent viloyati Yangiyo‘l tumanida 23-mart kuni 38 yoshli erkak ikki kishini o‘ldirib, yoqib yubordi. Bu haqda “Daryo”ga Bosh prokuratura matbuot kotibi Hayot Shamsutdinov xabar berdi.
Ma’lum bo‘lishicha, shu kuni soat 14:30 da “Nurli diyor” mas’uliyati cheklangan jamiyatida agronom bo‘lib ishlagan 1961-yilda tug‘ilgan K.A. va jamiyat mutaxassisi 1984-yilda tug‘ilgan S.G. fuqaro B.J.ning yoniga borib, ijaraga olingan maydon uchun 40 million so‘m miqdorida haq talab qilgan.
Shu vaqtda voqea ishtirokchilari o‘rtasida janjal kelib chiqqan. Fuqaro B.J. pul bermaslik maqsadida ularni dala shiyponiga olib borib, oshxona pichog‘i bilan qasddan o‘ldirgan. Shundan so‘ng u jinoiy harakatlarini yashirish uchun murdalarni yoqib, tana qoldiqlarini ariq bo‘yiga tashlab yuborgan.
Mazkur holat yuzasidan Jinoyat kodeksining 97-moddasi (qasddan odam o‘ldirish) 2-qismi “a, j, i” bandlari bilan jinoyat ishlari qo‘zg‘atilgan. Gumonlanuvchi shaxs prosessual tartibda ushlangan.
Izoh (0)