Iqtisodiyot va moliya vazirligi “Tashabbusli budjet” loyihasida Face ID yordamida identifikatsiya qilish mexanizmi joriy etilishi mumkinligini ma’lum qilgandi. Vazir Sherzod Kudbiyev bu ma’lumotni rad etdi.
Vazirlik xabarida aytilishicha, yirik mahallalar aholi soni yuqori bo‘lgani sababli ovoz berishda ustunlikka ega bo‘lishi mumkinligi aniqlangan. Ovoz berishda tengsizlikka yo‘l qo‘ymaslik, barcha mahallalar uchun loyihalarni amalga oshirishda teng imkoniyatlar yaratish maqsadida vazirlik tomonidan bir qancha texnik va uslubiy yechimlar ishlab chiqilmoqda.
Jumladan, Face ID yordamida identifikatsiya qilish mexanizmini joriy etish. Bunda, tasdiqlangan foydalanuvchilar tomonidan berilgan ovozlarni sms orqali berilgan 5 yoki 10 ovozga tenglashtirish, kam sonli aholi yashaydigan mahallalar aholisi tomonidan ilgari surilgan loyihalar uchun ko‘paytirish koeffitsiyentini joriy etish amaliyoti ko‘rib chiqiladi. Bunda kichik mahallalar loyihalariga katta mahallalar aholisi tashabbusi bilan teng sharoitlarda raqobatlashish imkoniyati yaratilishi ko‘zda tutilgan.
Keyinchalik Iqtisodiyot va moliya vaziri Sherzod Kudbiyev “Tashabbusli budjet” loyihasida Face ID yordamida identifikatsiya qilish mexanizmi joriy etilmasligini ma’lum qildi.
“Hech qanday Face ID va koeffitsiyentni kamaytiruvchi yoki ko‘paytiruvchi imtiyozlar kiritilishi ko‘zda tutilmayapti. Bularning barchasi ovoz berish jarayonini soxtalashtirish yoki ko‘paytirib ko‘rsatishga qarshi kurashishga mo‘ljallangan vazirlik darajasidagi takliflar edi. Axborot xizmati hali xom bo‘lgan loyihani e’lon qilib yuborgan”, — deydi vazir.
Izoh (0)