“Katta mulozimlar ham ‘podval’larga tushib-chiqardi” — Kamoliddin Rabbimov san’atkorlar Islom Karimov davrini tanqid qilayotgani haqida

Taniqli siyosatshunos Kamoliddin Rabbimov o‘zining Facebook’dagi sahifasi orqali O‘zbekistondagi taniqli san’atkorlar Islom Karimov davrini tanqid qilayotganiga munosabat bildirdi.

Ko‘pchilik “Karimov davrida ko‘p narsalarga erishgan taniqli shaxslar, bugun uni tanqid qilishmoqda”, degan eʼtiroz bildirmoqda. Rabbimovga ko‘ra, bu tanqidlar – vaziyatni umumiylashtirish hisoblanadi. Haqiqatda, Yulduz Usmonova, Ozodbek Nazarbekov, Matyoqub Matchonov va boshqalar Karimov davrida ko‘zga ko‘ringan sanʼat arboblari edi.

“Lekin jamiyatimiz, odamlar Karimov davridagi o‘yin qoidasini to‘liq anglashi, buni unutmasligi kerak. Karimov davrida, nafaqat san’atkorlar, balki davlat arboblari ham misli ko‘rilmagan bosim ostida edi. O‘sha vaqtlarda ham Karimovning ishonchida bo‘lgan, katta mulozim bo‘lib ishlab turgan odamlar, haftasiga, oyiga kamida bir-ikki marta podvallarga tushib chiqishardi. Bu – sof Stalincha boshqaruv edi. Muttasil qo‘rqitish va vaqti-vaqti bilan mukofotlash”, — deb yozadi siyosatshunos.

Kamoliddin Rabbimov Yulduz Usmonova qanchalik “Gulisan” deb kuylamasin, u O‘zbekistondan chiqarib yuborilganini eslatib o‘tgan. “Bir vaqtlar opani o‘zi ‘yurtfurushlar, tuprog‘ingga zor bo‘ladi’ deb kuylagan edi va ko‘p yillar o‘zi Turkiyada yashashga majbur bo‘ldi. Ozodbek Nazarbekov ham, Matyoqub Matchonov va boshqalar ham, Karimov davrida tanilgani, davlat mukofotlari va lavozimlar olgani rost. Lekin bu davrdagi qo‘rquv muhiti, odamlarning bir-biriga ishonmasligi, total nazorat tizimi, kechga borib nima bo‘lishini hech kim bilmasligi – davlat siyosatining odati edi”, — deya ta’kidlaydi u.

Rabbimovning qayd etishicha, bugun vaziyat biz istagan darajada huquqiy, liberal emas. Davlat koridorlarida, jamiyatda, odamlarning tafakkurida kurash ketayapti. Lekin bugun odamlar ijtimoiy tarmoqlarda bemalol hokimiyatni tanqid qilyapti. Kelajakda odamlar hukumatni rasmiy OAVlarida, TV kanallarida tanqid qila olishlari kerak.

“Lekin ijtimoiy tarmoqlarda ham qo‘rqmasdan, ommaviy tanqid qilish asosida bitta ishonch bor, yaʼni ‘men hokimiyatni tanqid qilaman va buning uchun menga hech narsa bo‘lmaydi!’, degan ishonch. Bu ishonch, aslida, ikkinchi maʼmuriyat uchun katta yutuq, tarixiy tan olish hisoblanadi”, — deydi Rabbimov.