Turkiyada erkak o‘zi bilan birga yashagan o‘zbekistonlik ayolni tosh bilan o‘ldirib, jasadini bo‘laklab, muzlatkichda saqlagani aniqlandi (video)
Istanbulning Baxchelievler tumanida 40 yoshli o‘zbekistonlik ayolni tosh bilan o‘ldirib, jasadini maydalab, muzlatkichga qo‘ygan 60 yoshli erkak qo‘lga olindi. Bu haqda Hurriyet xabar berdi.
Ma’lum qilinishicha, qotillikda ayblangan erkak qilgan ishidan afsuslanmagan.
“Koshki bu ishni Ramazon oyida qilmasaydim, gunoh bo‘ldi. Men bundan afsuslanmayman. Xohlaganimni qildim, hujumni rejalashtirmaganman”, — degan u.
Voqea 23-mart kuni mahalliy vaqt bilan ertalab soat 05:30 da yuz bergan. Qotillikda ayblangan erkak uzoq vaqt birga yashagan o‘zbekistonlik ayoldan 17 ming lira (891 dollar) qarz olganini aytgan. Ular o‘rtasida kredit bo‘yicha qarzdorlik va oldingi qarzlar bo‘yicha kelishmovchilik yuzaga kelgan. O‘zaro janjaldan keyin erkak O‘zbekiston fuqarosini tosh bilan o‘ldirib, jasadini bo‘laklab tashlagan. U ayolning kesilgan bo‘laklarini chiqindiga mo‘ljallangan qoplarga solib, muzlatkichga qo‘ygan.
Uydan janjal ovozlarini eshitgan qo‘shnilar politsiyaga xabar bergan. Ogohlantirish bo‘yicha uyga kelgan politsiya guruhlari o‘ldirilgan ayol jasadini muzlatkichdan topib, gumondorni qo‘lga olgan.
“Erkak qo‘lga tushmaslik uchun jasadni qismlarga ajratib, vaqti-vaqti bilan axlatga tashlashni rejalashtirgan”, — deyiladi xabarda.
Voqea yuzasidan olib borilgan tergov ishlari doirasida yangi ma’lumotlar paydo bo‘ldi. Unga ko‘ra, gumonlanuvchi bilan marhuma o‘rtasida ancha vaqtdan beri kelishmovchilik bo‘lgan, erkak shu sababdan ayolni o‘ldirishni rejalashtirgan. Xususan, qotillikda ayblanuvchi buning uchun uyiga tosh olib kirgani ma’lum bo‘ldi.
Ma’lum bo‘lishicha, gumonlanuvchi politsiya bo‘limida sodir etgan jinoyatiga iqror bo‘lgan.
“U yotgan payti boshiga tosh bilan 5 marta urdim. U menga seni yaxshi ko‘raman, iltimos, bunday qilma, dedi. Keyin uni bo‘g‘dim, uning ovozi hamon eshitilardi. Uni o‘ldirishga ko‘p harakat qildim, ehtimol bir soat. Hamma joy qonga bo‘yalgandi. Keyin qo‘llarini kesib oldim. Niyatim ularni butunlay kesib, hidlanmasligi uchun muzlatkichga qo‘yish edi. Harakat qildim, lekin kesolmagach, borib arra sotib oldim. Ertasi kuni kartadan pul yechdim, bank qarzini to‘ladim. Koshki uni Ramazon oyida o‘ldirmasaydim, gunoh bo‘ldi. Bundan afsuslanmayman. Xohlaganimni qildim. Men buni rejalashtirmaganman”, — degan u.
Erkak dahshatli his-tuyg‘ular yoki qiynoqlar yordamida qasddan qotillikda ayblanib, hibsga olingan.
