Turkiya prezidentligiga nomzod va “Vatan” partiyasi yetakchisi Do‘g‘u Perinchek saylovlarda g‘alaba qozonsa, Anqarani NATOdan chiqarishga va’da berdi. Bu haqda turkiyalik siyosatchi “RIA Novosti”ga ma’lum qildi.
Perinchek bunday qadamni so‘rovnoma natijalariga ko‘ra, turk aholisining 80 foizi AQSHni tahdid, 70 foizi esa Rossiya va Xitoyni do‘st deb bilishi bilan izohladi. “Bizning boshqaruvimiz ostida Turkiya NATOdan albatta chiqadi, chunki NATO Turkiya uchun yagona tahdiddir”, — dedi Perinchek.
Siyosatchi G‘arbning Rossiyaga qarshi sanksiyalarini tan olmasligini, agar saylovda g‘alaba qozonsa, ularga qarshi kurashishini qo‘shimcha qildi. “Rossiyaga qarshi sanksiyalar Turkiyaga qarshi sanksiyalardir, biz esa bu sanksiyalarga qarshi kurashish uchun oltin imkoniyatdan foydalanamiz”, — dedi u.
Turkiyada umumiy saylovlar 14-may kuni bo‘lib o‘tadi. Mamlakat xalqi prezident va 600 nafar parlament a’zosini saylaydi. Qonunga ko‘ra, Turkiyada umumiy saylovlar 18-iyungacha o‘tkazilishi kerak, biroq yanvar oyida amaldagi prezident Rajab Toyyib Erdo‘g‘on ularni bir oy avval o‘tkazish tashabbusi bilan chiqqan. Fevral oyi boshida mamlakat tarixidagi eng yirik zilziladan so‘ng Erdo‘g‘on shtab-kvartirasi falokat tufayli saylovlarni 18-iyunga ko‘chirishni taklif qilgan, biroq Turkiya rahbari buni rad etgan.
Do‘g‘u Perinchek 80 yoshda. U prezidentlik saylovida birinchi marta qatnashayotgani yo‘q. 2018-yilgi saylovlarda unga 98 926 kishi (0,2 foiz) ovoz bergan, o‘shanda Erdo‘g‘on 52,59 foiz ovoz olgan. 2022-yil fevral oyi boshida Perinchek NATOning sharq tomon kengayishi nafaqat Rossiya, balki Turkiya, Eron va Xitoy, shuningdek, ittifoqning o‘ziga ham xavf tug‘dirishi haqida gapirgan.
Izoh (0)