Ijtimoiy tarmoqlarda “Open budget” portalidagi loyihalarga ovoz berish jarayonida “nakrutkadan” foydalanilayotgani haqida xabarlar tarqaldi. “Daryo” muxbiri Moliya vazirligi bilan bog‘lanib, holat yuzasidan izoh oldi.
Vazirlik matbuot xizmati rahbari Sarvinoz Ahmedovaning ma’lum qilishicha, portalda sun’iy yo‘l bilan ovoz to‘plashning iloji yo‘q, har bir ovozning qaysi raqamdan, qachon berilgani, qanday SMS yuborilgani doimiy yozib boriladi.
Bundan tashqari, tekshiruv maqsadida ko‘p ovoz to‘playotgan tashabbuslarga ovoz berganlarning telefon raqamlariga qo‘ng‘iroq qilib ko‘rilganda, ular o‘z roziligi bilan tanlov qilganini aytgan.
“Hozircha hech qanday noqonuniy harakatni uchratmadik. Tizim axborot xavfsizligi tekshiruvidan o‘tkazilgan, muammo kuzatilmagan. Agar dasturchilar bunday holatga yo‘l qo‘ysa, vazifasini suiste’mol qilganlikda ayblanadi. Hamma narsaning o‘z ‘loglari’ bor”, — deydi vazirlik mutaxassisi.
Shuningdek, fuqarolar ovoz berish jarayonida bevosita zarur bo‘lgan SMS-xabarnomalar Beeline aloqa operatoriga tegishli abonentlarning telefon raqamiga yetib kelmayotganidan shikoyat qilmoqda. Sarvinoz Ahmedova bu holat “mobil provayderlar bilan kuzatilayotgan muammo” sabab yuz berayotganini ma’lum qildi.
Izoh (0)